Kólik jáne kommýnıkatsııa mınıstrligi: Jumysshylardyń eńbek pen turmys jaǵdaıy erekshe baqylaýǵa alyndy
ASTANA. Mamyrdyń 24-i. QazAqparat - Kólik jáne kommýnıkatsııa mınıstrliginde vedomstvo basshysy Ábilǵazy Qusaıynovtyń tóraǵalyǵymen 2010-2014 jyldarǵa arnalǵan Údemeli ındýstraldy-ınnovatsııalyq damý memlekettik baǵdarlamasyn iske asyrý jónindegi Respýblıkalyq basqarý ortalyǵy Aımaqtyq ortalyǵynyń kezekti otyrys ótti.
Bul aqparatty atalǵan mınıstrliktiń baspasóz qyzmeti taratyp otyr.
Otyrys barysynda Aqtóbe, Jambyl, Qyzylorda oblystarynda «Batys Eýropa - Batys Qytaı» jobasynyń iske asyrylý barysy talqylanǵan. Oǵan oblys ákimdikteri, merdigerlik uıymdar basshylary men jobany basqarý jáne qurylysty baqylaý jónindegi konsýltant-kompanııalar ókilderi qatysqan.
«Otyrys jumysyn ashqan Ábilǵazy Qusaıynov, qazirgi kezde úsh aımaqtyń bárinde de qarqyndy jumys júrgizilip jatqanyn atap ótti. Sondaı-aq, jobanyń ýaqytyly ári sapaly iske asýyna áserin tıgizetin máseleleri bar ekenine erekshe nazar aýdardy. Onyń ishinde, jumys barysynyń nasharlyǵyna baılanysty «DenaRehzasQazaqstan» JShS-ine kompanııasyna eskertý jasaldy», delingen baspasóz baıanynda.
Ótken otyrystardyń nátıjesinen «Salını» AQ qyzmetinde alǵa jyljý baıqalady. Búgingi tańda birqatar eskertýler boıynsha jáne jer tósemin salý men asfalt-beton zaýytyn qurastyrý kestesi merzimde oryndalýda. Biraq, keıbir enshiles merdigerlik kompanııalarda jol qurylysy tehnıkasyn, materıaldar men qyzmetkerlerdi jumyldyrý barysynda keshiktirýler bar. Olardyń qatarynda «DMSÝ 22» JShS, «Shym-Shak NS» JShS jáne «Vıtajolqurylys» JShS-i bar.
Vedomstvonyń aqparatyna qaraǵanda, «Akkord/Okan» BK pen «Impreza» AQ kompanııalarynda buryn jasalǵan eskertpeler boıynsha jaǵdaı ózgermegen. Qazirgi kezde Kólik jáne kommýnıkatsııa mınıstrligi atalǵan merdigerlik kompanııalarǵa berilgen ýchaskelerdi qarjylandyratyn Dúnıejúzilik bankke kelisimshartty buzý nıeti jóninde hat joldady.
«Al «K-Jolqurylys» AQ-y men «Qazaqjolqurylys» JShS merdigerlik kompanııalary eskertýlerdi basshylyqqa alyp, jaqsy nátıjege jetýde. Jer tóseý men jol qurylys tehnıkasyn jumyldyrý jumystary keste boıynsha jasalýda. «KSS/Jambyljolqurylys» jáne «Aqmola Qurylys Materıaldary» kompanııalarynda qosymsha tehnıka men jumysty uıymdastyrý máseleleri áli de sheshim tapqan joq», delingen baspasóz habarlamasynda.
Otyrys barysynda Avtomobıl joldary komıtetiniń oblystyq departamentteri jáne merdigerlik uıymdar basshylary esep berip, jobanyń barlyq qatysýshylaryna sáıkesinshe tapsyrmalar berildi. Onyń ishinde, merdigerlik uıymdarǵa jumys júrgizý, tehnıka men qyzmetkerlerdi jumyldyrý kestelerin oryndaý merzimderi bekitildi. Atalǵan komıtettiń oblystyq departamentterine merdigerlik uıymdar jumysty merzimde júrgizýin, aınalma joldardyń salynýyn jáne jol qozǵalysyn qamtamasyz etilýin qadaǵalaýǵa tapsyrma berildi. Úsh oblystyń ákimdik ókilderine jer karerlerin rásimdeý men jerdi satyp alý máselelerin sheship, osy jumys jóninde aqparatty apta saıyn berý tapsyryldy.
Sonymen qatar, «Nur Otan» HDP sarapshy toptyń jasaǵan eskertýlerdi basshylyqqa alyp, barlyq merdigerlik kompanııalarǵa qyzmetkerlerdiń jumys pen turmys jaǵdaıyn qamtamasyz etý, jalaqyny tóleý kestesi men jergilikti halyqty jumysqa tartý talaptaryn oryndaý jóninde tapsyrma berildi. Osyǵan qosa, atalǵan máseleler Avtomobıl joldar komıtetiniń erekshe baqylaýyna alyndy. Jumys jáne turmys jaǵdaıy qamtamasyz etý jóninde baqylaý komıtetiniń tóraǵasy Z.Saǵynovqa, al jalaqyny ýaqytyly tóleý jáne jergilikti halyqty jumysqa alý máselelerdi baqylaý onyń orynbasarlary N.Ómirbaev jáne E.Júnisovke júkteldi.
Otyrys jumysyn aıaqtaı otyryp, kóliktik vedomstvo basshysy bul jobanyń erekshe baqylaýda ekenin atap ótti. Onyń iske asyrý birneshe aımaqqa mańyzdy ekendigine baılanysty, árbir kezeńdegi jumystardyń sapaly ári ýaqytyly oryndalǵanyn baqylaý qajet ekenin aıtty.
