Kólik jáne kommýnıkatsııa mınıstrligi joldardy basqarýdyń ulttyq operatoryn qurýdy qarastyryp jatyr
ASTANA. 25 qazan. QazAqparat - QR Kólik jáne kommýnıkatsııa mınıstrligi «QazAvtoJol» kásipornynyń bazasynda elimizdegi joldardy basqarý boıynsha ulttyq operator qurýdy josparlaıdy.
Bul týraly búgin atalǵan mınıstrliktiń Avtokólik joldary komıtetiniń tóraǵasy Nurlanbek Ómirbaev málim etti.
Komıtet tóraǵasynyń aıtýynsha, búgingi kúni mınıstrlikte biregeı ulttyq operator qyzmetin engizý máselesi qaralýda. Ondaı operator negizinen respýblıka joldaryn, onyń ishinde aqyly joldardy basqaratyn bolady, sondaı-aq bıýdjettik jáne memlekettik-jeke áriptestik jobalardy júzege asyrýdy da qolǵa alady.
«Búgingi tańda Kólik jáne kommýnıkatsııa mınıstrligi ulttyq operator engizýge qatysty zańnamalyq aktilerge tıisti ózgerister engizýde. Bul ózgerister jaqynda Úkimetke usynylatyn bolady. Jalpy zań jobasy boıynsha «QazAvtoJol» bazasynda ulttyq operator qurý qarastyrylady», - deıdi N. Ómirbaev.
Budan bólek, komıtet tóraǵasy mınıstrliktiń josparyna toqtala kele, ınvestorlar qarajattaryn tartý úshin ulttyq operatorǵa ınfraqurylymdyq oblıgatsııalar shyǵarý jónindegi ókilettilik qarastyrylatynyn jetkizdi.
