Kólik jáne kommýnıkatsııa mınıstrligi temirjol vokzaldary ǵımarattaryn tapsyrý-qabyldaý máselesi boıynsha keńes ótkizdi
ASTANA. Aqpannyń 13-i. QazAqparat - Kólik jáne kommýnıkatsııa mınıstrliginde vıtse-mınıstr Azat Bekturovtyń tóraǵalyǵymen ótken keńeste temirjol vokzaldarynyń ǵımarattaryn «TemirjolMúlik» aktsıonerlik qoǵamynyń kommýnaldyq menshigi men balansynan «Qazaqstan temir joly» ulttyq kompanııasynyń balansyna tapsyrý-qabyldaý máselesi qaraldy,
dep habarlady vedomstvonyń baspasóz qyzmetinen.
«Keńes barysynda jergilikti atqarýshy organdar men «TemijolMúlik» balansyndaǵy temirjol vokzaldary ǵımarattaryn qabyldaý boıynsha atqarylyp jatqan máseleler, sonymen qatar atalǵan problemaǵa qatysty ózge de birqatar jaıttar talqylandy», delingen habarlamada.
Vıtse-mınıstr Azat Bekturov óz sózinde, Qazaqstan Respýblıkasy Premer-Mınıstri Kárim Másimovtiń «Qazaqstan temir joly» ulttyq kompanııasynyń alqa májilisinde bergen tapsyrmasyn oryndaý maqsatynda Kólik jáne kommýnıkatsııa mınıstrliginiń temirjol vokzaldary ǵımarattaryn, perrondar men platformalardy kommýnaldyq menshikten respýblıkalyq menshikke tapsyrý máselelerin qarastyratyn «Temirjol múlkiniń keıbir máseleleri týraly» Qazaqstan Respýblıkasy Úkimeti qaýlysynyń jobasyn ázirlegenin atap ótti. Qazirgi ýaqytta qaýly jobasy tıisti memlekettik organdar men Qazaqstan Respýblıkasy uıymdaryna jiberildi.
Mınıstrliktiń málimetteri boıynsha, «Vokzal-servıs» AQ (27 birlik) jáne jergilikti atqarýshy organdardyń (94 birlik) temirjol vokzaldary ǵımarattarynan ózge «TemirjolMúlik» AQ-nyń qaramaǵynda 184 vokzal bar.
Al «Qazaqstan temir joly» kompanııasynyń ókilderi keńeske qatysýshylardy jergilikti atqarýshy organdar men «TemirjolMúlik» AQ balansyndaǵy temirjol vokzaldaryn qabyldaý jaǵdaıy týraly maǵlumat berdi.
Azat Bekturov keńes qorytyndysy boıynsha, «Qazaqstan temir joly», «Jolaýshylar tasymaly» jáne «Vokzal-servıs» kompanııalarynyń kommýnaldyq menshiginen respýblıkalyq menshikke vokzaldardy ótkizý jónindegi ózekti máselelerdi qarastyrý, sonymen qatar naqty oryndalý merzimderin anyqtap, olardy sheshý joldaryn belgileý jóninde tapsyrma berdi.
