Kólik jáne kommýnıkatsııa mınıstrligi: Temirjol kóligindegi qaýipsizdikti qamtamasyz etý boıynsha birlesken is-qımyl jospary qabyldandy
ASTANA. Shildeniń 28-i. QazAqparat - Búgin QR Kólik jáne kommýnıkatsııa mınıstrliginde temirjol kóligindegi qozǵalys qaýipsizdigi máselesine arnalǵan keńes aıasynda salanyń aǵymdaǵy jyldyń birinshi jartyjyldyǵynyń qorytyndysy qarastyrylyp, basty maqsattar anyqtaldy. Bul aqparatty atalǵan vedomstvonyń baspasóz qyzmeti taratyp otyr.
Alqaly jıynǵa aımaqaralyq kóliktik baqylaý ınspektsııasy jáne onyń fılıaldarynyń basshylary, sondaı-aq «Qazaqstan temir joly» UK» AQ-y men Ortalyq aımaqtyq kólik prokýratýrasynyń ókilderi qatysty.
Vedomstvonyń habarlaýynsha, is-shara barysynda Kóliktik baqylaý komıtetiniń tóraǵasy Ádilet Barmenqulov temirjol kóligin paıdalanýdyń qaýipsizdigin qamtamasyz etý máseleleri birlesip kúsh salý men kelisilgen áreket jasaýdy talap etetindigin atap ótti. «Osyǵan baılanysty Kóliktik baqylaý komıteti men «Qazaqstan temir joly» UK» AQ birlesip, uıymdastyrý sharalaryn kúsheıtýge jáne poıyzdardyń qozǵalys qaýipsizdigin qamtamasyz etýge baǵyttalǵan birlesken is-qımyl josparyn ázirlep, qabyldady», delingen baspasóz habarlamasynda.
