Kólik jáne kommýnıkatsııa mınıstrligi: «Skýter» aktsııasy oń nátıje berdi
ASTANA. Qyrkúıektiń 16-sy. QazAqparat - Búgin Almatyda ótken baspasóz máslıhatda Kóliktik baqylaý komıtetiniń sý kóligindegi baqylaý máseleleri qarastyrylyp, osy saladaǵy jasalǵan 8 aıdaǵy jumys qorytyndylary saralandy.
Sondaı-aq «Skýter» jedel aldyn alý aktsııasynyń nátıjeleri de talqylandy, dep habarlaıdy QazAqparat Kólik jáne kommýnıkatsııa mınıstrliginiń baspasóz qyzmetine silteme jasap.
Jýrnalıster tarapynan qoıylǵan saýaldarǵa QR KKM Kóliktik baqylaý komıtetiniń basqarma bastyǵy Erlan Jumashev jáne «Jetisý» óńiraralyq kóliktik baqylaý ınspektsııasynyń bastyǵy Saımasaı Álmuhambetov jaýap qaıtardy.
Qazirgi kezde Qazaqstanda Kaspıı aýmaǵynda saýda teńizde júzý men ishki sý kóligi arqyly ishki týrızm qarqyndy damýda. Jyl saıyn teńizdik jáne shaǵyn kemeler sany 6 paıyzǵa ósip otyrady. Búgingi kúni olardyń sany - 26201, ótken jylmen salystyrǵanda 1473 keme qosylǵan.
2009 jylǵy flottaǵy apattylyqtyń aldyn alý jónindegi is-sharalar josparyna sáıkes kóliktik baqylaý komıtetiniń qurylymdyq bólimsheleri sý kóligindegi baqylaýdy iske asyrýda.
Basty baǵyttardyń biri - keme ıeleri men shaǵyn flot turaqtarynyń ıelerimen aldyn alý jumysyn júrgizý. Keme júzetin sý joldarynyń jaı-kúıi men shaǵyn jáne orta bıznes sanatyna jatpaıtyn sýbektilerdi tekserýin uıymdastyrýǵa erekshe kóńil bólinedi. Olar - Respýblıkalyq memlekettik qazynalyq sý joldary kásiporny (RMKSJK), «Aqtaý halyqaralyq teńiz saýda porty» respýblıkalyq memlekettik kásiporny («AHTSP» RMK), «Qazteńizkólikfloty» AQ.
Zańnamany buzýdy aldyn alý úshin sý joldarynyń ashylýynan buryn kóliktik baqylaý ınspektsııalary jergilikti atqarýshy organdar, keme ıeleri jáne shaǵyn kemeler men demalys oryndar ıeleri qatysýymen keńester ótkizdi.
Shaǵyn flot, onyń ishinde joǵary jyldamdyqty kemelerdiń adamdardyń jappaı demalý oryndarynda qaýipsiz paıdalanýyn qadaǵalaýǵa arnalǵan «Skýter» respýblıkalyq aktsııasynyń mańyzy zor.
Aktsııa sheńberinde jergilikti memlekettik jáne atqarýshy organdar ókilderiniń qatysýymen kóshpeli reıdtik tekserýler júrgizildi. Serýendik, sporttyq jáne shaǵyn kemelerdi qaýipsiz paıdalaný máselesine erekshe kóńil aýdarý maqsatymen keıbir reıdterge BAQ ókilderi qatysty.
«Skýter» sharasynyń qorytyndysy boıynsha Shaǵyn kemelerdi paıdalaný erejelerin buzýdyń 297 faktisi anyqtalyp, olardy joıǵanǵa deıin 109kemeni paıdalanýǵa tyıym salyndy.
Keme júzetin sý joldary men navıgatsııalyq qural jabdyqtar jaǵdaılaryna baqylaý júrgizý maqsatynda 7966 km sý joldary qaraldy, olardyń nátıjesi boıynsha RMKSJK atyna 17 jazba eskertpeleri berildi.
Aǵymdaǵy jyldyń 8 aı ishinde sý kóligine baqylaý salasynda Kóliktik baqylaý komıtetiniń qyzmet qorytyndysy boıynsha jalpy aıqyndalǵan jónsizdikterdi joıý úshin 133 jazba eskertpeler berilgen, 409 ákimshilik jónsizdikter aıqyndalǵan, bıýdjetke 1 444 734 teńge kóleminde aıyppul óndirilgen.
Budan ári sýdaǵy kólik oqıǵalaryn aldyn alý maqsatynda Kóliktik baqylaý komıteti demalys oryndary, shaǵyn kemelerdiń bazalyq turaqtarynyń ıelerimen júzý maýsymy ashylmas buryn shaǵyn kemelerdi qaýipsiz paıdalaný máselesi boıynsha sharalardy kúsheıtýdi josparlap otyr.
Sonymen qatar, shaǵyn kemelerdi qaýipsiz paıdalaný, ózge de memlekettik organdarmen birge sý kóliginde qaýipsizdikti qamtamasyz etýge baǵyttalǵan aldyn alý sharalaryn ótkizý týraly keme ıelerine buqaralyq aqparat quraldary arqyly habarlandyrý erekshe baqylaýǵa alynady.
