Kólik jáne kommýnıkatsııa mınıstrligi: naýryzdyń 21-i kúni Qyzylaǵash - Jansúgirov ýchaskesindegi jol ashyldy
ASTANA. Naýryzdyń 22-si. QazAqparat - Naýryzdyń 22-degi jaǵdaı boıynsha, Almaty oblysynda sý tasqynynan buzylǵan 27 avtokólik joldarynyń 23 ýchaskesi qalpyna keltirildi. Qalǵan 4 ýchaskedegi qatynas aınalma joldar arqyly qamtamasyz etilýde,
dep habarlaıdy Kólik jáne kommýnıkatsııa mınıstrliginiń baspasóz qyzmeti.
Aınalma jol jáne Qyzylaǵash ózeni arqyly ótetin ýaqytsha kópirdiń salynýyna baılanysty keshe, naýryzdyń 21-inde Almaty - Óskemen avtomobıl jolynyń Qyzylaǵash - Jansúgirov ýchaskesi boıynsha qozǵalys ashyldy.
Sonymen qatar, Úsharal - Dostyq avtojolynyń 81-83-shi shaqyrymdary boıynsha aınalma jol boıynsha qatynas qamtamasyz etildi. Atalǵan ýchaskedegi joldy batpaqtan tazalaý jumystary júrgizilýde.
