Kólik jáne kommýnıkatsııa mınıstrligi: maýsymdyq «Skýter» sharasy bastaldy
ASTANA. Mamyrdyń 31-i. QazAqparat - Erteń, maýsymnyń 1-inen bastap elimizde jyl saıynǵy «Skýter» sharasy bastalap, ol shomylý maýsymy aıaqtalǵanǵa deıin jalǵasady.
Bul aqparatty QR Kólik jáne kommýnıkatsııa mınıstrliginiń baspasóz qyzmeti taratyp otyr.
«QR Kólik jáne kommýnıkatsııa mınıstrligi Kóliktik baqylaý komıteti shaǵyn ólshemdi kemelerdi qaýipsiz paıdalanýdy erekshe nazarǵa alyp otyr. Osyǵan oraı kóliktik baqylaý organdary jyl saıyn maýsymnyń 1-inen tamyzdyń 31-ine deıin «Skýter» aktsııasyn ótkizýde. Іs-sharanyń maqsaty shaǵyn ólshemdi flotty: joǵary jyldamdyqty, serýendeýge arnalǵan, sporttyq jáne ózge de shaǵyn ólshemdi kemelerdi adamdar demalatyn kópshilik oryndarda qaýipsiz paıdalanýdy qamtamasyz etýdi baqylaýdy júzege asyrý bolyp tabylady», delingen baspasóz habarlamasynda.
Vedomstvonyń taratqan aqparatyna sáıkes, jyl saıyn shaǵyn ólshemdi kemeniń sany orta eseppen 6 paıyzǵa ulǵaıýda. Búgingi kúni olardyń sany 25793 birlikke jetken. Statıstıkalyq málimetterge sáıkes 2009 jyly shaǵyn ólshemdi kemelermen 7 kólik oqıǵasy tirkelse, onyń nátıjesinde 5 adam qaıtys bolyp, 3 adam jaraqat alǵan.
Kóliktik baqylaý organdarynyń negizgi baǵyttarynyń biri keme ıelerimen jáne shaǵyn ólshemdi flotqa arnalǵan baza-turaqtardyń ıelerimen saqtandyrý jumystaryn júrgizý bolyp tabylady. Shaǵyn ólshemdi kemelerdiń tehnıkalyq qaýipsizdigi, kólik oqıǵalarynyń aldyn alý maqsatynda baza-turaqtardy jáne qaıyqtardy jalǵa berý beketterinde tekserý júrgizý basty orynda tur.
2009 jyldyń qorytyndysy boıynsha «Skýter» aktsııasynyń barysynda shaǵyn ólshemdi kemelerdi paıdalaný erejesine sáıkes 297 buzýshylyq anyqtalyp, 250 adam ákimshilik jaýapkershilikke tartylǵan. Ereje buzýshylyq joıylǵanǵa deıin 109 kemeni paıdalanýǵa tyıym salyndy, respýblıkalyq bıýdjetke 933 683 teńge somasynda aıyppul óndirilgen.
QR Kólik jáne kommýnıkatsııa mınıstrligi Kóliktik baqylaý komıteti mynalardy habarlaıdy: qaıyqtardy jalǵa berý beketiniń ıesi jalǵa berý beketin tirkeý kezinde ony tehnıkalyq kýálandyrýǵa usynýy qajet; sý aılaǵynyń shekarasy dambamen, pontonmen, baktarmen jáne júzbeli quraldarmen qorshalýy tıis; jalǵa berý beketterinde kemelerdi azamattarǵa berý jýrnalynda kemeni paıdalanýdyń qaýipsizdik sharalarymen tanysý jónindegi baǵanda kemeni alǵan azamattyń qoly qoıylýy qajet; kemeni sýǵa jiberýden buryn qaýipsizdik sharalary boıynsha mindetti nusqama júrgiziledi. Qutqarý quraldary joq bolǵan jaǵdaıda azamattar olardy talap etýleri kerek.
Kólik salasyndaǵy QR-nyń qoldanystaǵy zańnamasynyń talaptary boıynsha zań buzýshylyqtar anyqtalǵan jaǵdaıda zańdy jáne jeke tulǵalarǵa belgilengen tártippen «Ákimshilik quqyq buzýshylyq týraly» QR Kodeksine sáıkes ákimshilik sharalar qoldanylady.
