Kólik jáne kommýnıkatsııa mınıstrligi: Qoǵamdyq kóliktiń jumysy - erekshe nazarda
ASTANA. 31 naýryz. QazAqparat - 2011 jylǵy 25 naýryzda QR kólik jáne kommýnıkatsııa mınıstrliginiń Jaýapty hatshysy Jeńis Qasymbektiń tóraǵalyǵymen qoǵamdyq kólikke qatysty týyndaǵan ózekti máseleler boıynsha májilis ótkizildi.
Oǵan jergilikti atqarýshy organdardyń jáne avtokólik kásiporyndary qaýymdastyǵynyń ókilderi qatysty, dep habarlady atalmysh mınıstrliktiń baspasóz qyzmeti.
Qazirgi tańda qoǵamdyq kóliktiń jumysyn uıymdastyrý qaı óńirde bolmasyn ózekti máselege aınalyp otyr. Kólik jáne kommýnıkatsııa mınıstrliginiń saıty men mınıstrdiń resmı blogyna turǵyndar tarapynan kórsetiletin qyzmet sapasynyń tómen deńgeıde ekendigi týraly kóptegen shaǵymdar túsip jatady. Negizinen, bul - avtobýstardyń qozǵalys tártibinen aýytqýy, jol erejeleriniń buzylýy, avtobýs parki qyzmetkerleriniń tómen mádenı deńgeıi jáne avtokólik quraldarynyń azyp-tozýy týraly saýaldar.
Osyǵan oraı, oblystar men respýblıkalyq mańyzy bar qalalardaǵy jolaýshy kóligi men avtomobıl joldary basqarmalaryna joǵaryda aıtylǵan eskertýlerdi túzetý, jolaýshy avtoparkin jańartý, turǵyndarǵa kórsetiletin qyzmetterdiń sapasyn jaqsartý boıynsha aqparatty Kólik jáne kommýnıkatsııa mınıstrligine usyný týraly usynyldy. Sonymen qatar, qoǵamdyq kólikti paıdalaný úshin azamattardyń belgili bir sanatyna beriletin jeńildikter jóninde turǵyndardy habardar etý qajettiligi de aıtyldy.
Mınıstrliktiń Kólik jáne qatynas joldary komıtetine ústimizdegi jylǵy15 sáýirge deıin jergilikti atqarýshy organdar men tasymaldaýshylar arasynda Turaqty jolaýshy jáne júk tasymalyn uıymdastyrý týraly tıptik kelisimderdi bekitý boıynsha is-sharalardy qolǵa alý tapsyryldy. Bul tıptik kelisimderde otyrysta talqylanǵan kúrdeli máseleler retteletin bolady. Sonymen qatar, Avtomobıl kóligimen jolaýshylardy jáne júkterdi tasymaldaý erejeleriniń jobasy jergilikti atqarýshy organdarynyń usynystaryn esepke ala otyryp daıyndalady. Bul qujatta jolaýshylardy tasymaldaýǵa qatysýshylardyń jaýapkershilik aıasy anyqtalady.
