Kólik jáne kommýnıkatsııa mınıstrligi: Qazan jáne qarasha aılarynda 2 mıllıon 465 myń tonna astyq tasymaldandy

ASTANA. 13 jeltoqsan. QazAqparat. 2011 jylǵy 13 jeltoqsanda QR Kólik jáne kommýnıkatsııa mınıstri Berik Kamalıev QR aýylsharýashylyq mınıstri Asyljan Mamytbekovpen, sondaı-aq, «Qazaqstan temir joly» UK» AQ, «Azyq-túlik kontraktilik korporatsııasy» UK» AQ, «KazAgro» AQ jáne «Qazaqstan astyq odaǵy» ZTQ basshylarymen birlesip, astyqty tasymaldaý máselesi boıynsha selektorlyq keńes ótkizdi. Selektorǵa Qostanaı, Soltústik Qazaqstan jáne Aqmola oblystarynyń ákimdikteriniń ókilderi, sonymen birge, astyq jóneltýshiler qatysty,

dep habarlaıdy mınıstrliktiń baspasóz qyzmeti.

Keńestiń jumysyn asha otyryp, Berik Kamalıev atalǵan másele Úkimettiń turaqty qadaǵalaýynda jáne budan burynǵy selektorlyq keńesterde astyq tasymaldaýdy qamtamasyz etý jóninde belgilengen sharalardy atap ótti.

Qazan, qarasha aılarynda sáıkesinshe 1 mln. 193 myń tonna jáne 1 mln. 272 myń tonna astyq tasymaldandy. Atalǵan kólemder jospardaǵy kórsetkishterden 17% jáne 27% artyq..

Aýylsharýashylyq mınıstrliginiń memlekettik ınspektsııa komıteti demalys jáne mereke kúnderi tasymaldaý oryndarynda qajetti qujattamany rásimdeýdi tolyq kólemde qamtamasyz etti.

Kedendik baqylaý ornatylmaǵan stantsııalarda astyqty tasymaldaýdyń kedendik úzdiksiz rásimdelýin qamtamasyz etý máselesi áli sheshilmegen. Osyǵan baılanysty, kedendik qyzmet ókilderine kóshpeli beketter uıymdastyrý máselesin qaraý usynyldy.

Astyq qabyldaý kásiporyndarynyń astyqty tıeý jáne túsirý kezindegi úzdiksiz jumys uıymdastyrýdy qamtamasyz etý máselesinde ózara is-qımylyn úılestirý jóninde qıynshylyqtar bar. Keıbir astyq tıeý kásiporyndary demalys jáne mereke kúnderi astyqty tıeýdi uıymdastyrmaıdy, osyǵan baılanysty, aldaǵy merekelerdi eskere otyryp, atalǵan baǵyttaǵy jumystardy kúsheıtý jóninde tıisti sheshim qabyldandy.

Joǵaryda kórsetilgen máselelerdi qaraýdyń qorytyndylary boıynsha naqty tapsyrmalar berildi. Atalmysh tapsyrmalardyń oryndalý nátıjelerin aǵymdaǵy jylǵy 21 jeltoqsanǵa belgilengen kelesi selektorlyq keńeste qaraý josparlandy.