Kólik jáne kommýnıkatsııa mınıstrligi áleýmettik mańyzy bar oblysaralyq jolaýshy temir jol baǵdarlary tizimin tolyqtyrýdy josparlaýda
ASTANA. 19 qazan. QazAqparat - 2013 jylǵy 1 qańtardan bastap Qazaqstanda jańadan «Astana - Dostyq» temir jol baǵdaryn ashý josparlanýda.
Mınıstrlik Qazaqstan Respýblıkasy Úkimetine tıisti qaýlynyń jobasyn engizdi. Bul jaıynda QR Kólik jáne kommýnıkatsııa mınıstrliginiń málimetterinde habarlanǵan.
Buǵan deıin «Astana - Dostyq» marshrýty boıynsha temir jolmen jolaýshy tasymaly júrgizilmegen bolatyn. Jańa baǵdar áleýmettik mańyzy bar bul baǵyt jurtshylyqtyń jolaýshy tasymalyna suranysy bolýyna baılanysty ashyldy.
Munyń syrtynda mınıstrlik basqa da yntaly memlekettik organdarmen birlese otyryp áleýmettik mańyzy bar oblysaralyq qatynastar tizimin «Astana - Oral» jáne «Pavlodar - Qaraǵandy» baǵdarlarymen tolyqtyrýdy qarastyrýda. Osynyń nátıjesinde 2013 jyly «Astana - Aqtóbe» aralyǵyna qatynaıtyn № 57/58 poıyzdyń júrý marshrýty Oral stansasyna deıin, al «Pavlodar - Astana» aralyǵyna qatynaıtyn № 673/674 poıyzdyń júrý marshrýty Qaraǵandy stansasyna deıin uzartýǵa múmkindik ashylady.
Áleýmettik mańyzy bar qatynastarǵa tasymaldaýshy úshin kommertsııalyq jaǵynan paıda túsirmeıtin, biraq ta jurtshylyq arasynda suranysqa ıe marshrýttar jatatynyn atap ótýge bolady. Áleýmettik mańyzy bar baǵdarlar memlekettik bıýdjetten qarjylandyrylady.
