Kólik jáne kommýnıkatsııa mınıstri Reseıdegi qaıǵyly oqıǵadan keıin otandyq kólik nysandarynda qaýipsizdikti kúsheıtýdi tapsyrdy
ASTANA. 25 qańtar. QazAqparat - QR Kólik jáne kommýnıkatsııa mınıstri Ábilǵazy Qusaıynov Reseı Federatsııasynyń áýejaıynda bolǵan qaıǵyly oqıǵadan keıin otandyq kólik nysandarynda qaýipsizdik sharalaryn kúsheıtýdi tapsyrdy.
Mınıstrliktiń baspasóz qyzmetinen habarlaǵandaı, búgin vedomstvo basshysy quzyrly barlyq memlekettik organdardyń qatysýymen 7- Qysqy Azııa oıyndaryna kólik nysandarynyń daıyndyǵyna qatysty jınalys ótkizdi. Májiliste kóterilgen basty taqyryp Reseı Federatsııasynda bolǵan qaıǵyly oqıǵaǵa baılanysty kólik nysandarynda qaýipsizdik sharalaryn kúsheıtý boldy.
Á.Qusaıynovtyń aıtýynsha, 2010 jyldyń jeltoqsan aıynda ótken Astana Sammıtin esepke ala otyryp, qazirgi tańda elimizdiń basty kólik toǵysy bolyp tabylatyn Astana jáne Almaty qalalaryndaǵy áýejaılar men temirjol vokzaldary Azıada qonaqtaryn qarsy alýǵa daıyn. Qaýipsizdikti qamtamasyz etý sharalary tek Azıada kúnderinde ǵana emes, basqa ýaqyttarda da qolǵa alynatyn bolady. Búgingi kúnge deıin jolaýshylardyń kelip-ketýine baqylaýdy kúsheıtý aımaqtaryn belgileý, qosymsha baqylaý kameralaryn jáne júkterdi tekserý qurylǵylaryn ornatý is-sharalary júrgizildi.
