Kólik jáne kommýnıkatsııa mınıstri Qyzylorda oblysynda boldy

 Vedomstvo basshysy sapar barysynda Elbasynyń Joldaýynda aıtylǵan elimizdi damytýdyń barynsha mańyzdy baǵyttary tóńireginde túsindirme jumystaryn júrgizip, «Batys Eýropa-Batys Qytaı» halyqaralyq avtotrassasynyń qurylysymen tanysty. Mınıstr oblys aktıvimen kezdesýi kezinde damýdyń jańa kezeńinde elimiz ekonomıkasyn nyǵaıtý men qazaqstandyqtardyń ál-aýqaty máselesine erekshe nazar aýdardy. Osy oraıda túpki maqsaty turǵyndardy eńbekpen qamtý, qoljetimdi turǵyn úımen qamtamasyz etý, aımaqtardy damytý, sekildi birqatar jobalardy júzege asyrý mindeti alǵa qoıyldy. Kópshilik aldynda sóılegen sózinde A. Jumaǵalıev Joldaýda turǵyndarǵa memleket tarapynan kórsetiletin qyzmettiń sapasyn arttyrýǵa aıryqsha kóńil bólingenin atap ótti. Bul óz kezeginde sybaılas jemqorlyq derekterin aýyzdyqtaý men jurtshylyqtyń memlekettik organdarǵa senimin ulǵaıtýdyń alǵy sharttaryn qalyptastyrady. Osyǵan baılanysty, dep tujyrymdady mınıstr, budan ári Kólik jáne kommýnıkatsııa mınıstrligi aldyna Elektrondy úkimetti damyta túsý jóninde birqatar mańyzdy mindetter qoıylyp otyr. 2012 jyldyń sońyna deıin áleýmettik mańyzy bar memlekettik qyzmet túrlerin 60 paıyzǵa deıin jetkizip, olardy elektrondy formatqa kóshirý kerek. Al 2013 jyldan bastap ruqsatnama sıpatyndaǵy barlyq qujattar elektrondy pishinde nemese turǵyndarǵa qyzmet kórsetý ortalyqtary arqyly beriletin bolady. Avtokólikterdi tirkeý men júrgizýshi kýáligin berý de osylaısha júrgiziledi.

  Joldaýda atap ótilgen barynsha mańyzdy baǵyttardyń qataryna «Batys Eýropa-Batys Qytaı» halyqaralyq tranzıttik dáliziniń qazaqstandyq bóligindegi qurylys jumystary da jatady. Bul avtobannyń qurylysy 2013 jyly tolyq aıaqtalýy tıis. Kezdesýler barysynda Kólik jáne kommýnıkatsııa mınıstri oblys ákimdigimen jasalǵan birneshe kelisim-shartqa qol qoıdy. Ol aımaqtyń kólik-kommýnıkatsııa júıesin damytý jónindegi is-sharalardy qolǵa alýdy kózdeıdi.