Kólik jáne kommýnıkatsııa mınıstri qazaqstandyq áýe kompanııalarynyń esebin tyńdady
ASTANA. Jeltoqsannyń 12-si. QazAqparat - QR Kólik jáne kommýnıkatsııa mınıstri Ábilǵazy Qusaıynov «Eır Astana», «Skat» avıakompanııalary jáne Astana qalasynyń halyqaralyq áýejaıynyń 2009 jyldyń 10 aıyndaǵy jumystarynyń qorytyndysymen tanysty,
dep habarlaıdy QazAqparat atalǵan mınıstrliktiń baspasóz qyzmetine silteme jasap.
«Eır Astana» avıakompanııasynyń jumysymen tanystyrǵan Pıter Forster, alǵash ret jolaýshylar tasymalynyń 6 paıyzǵa tómendegenin, sonyń saldarynan qarjy túsiminiń azaıǵandyǵyn málim etti. Degenmen, aǵymdaǵy jyldyń jetistigi retinde Almaty - Baký, Astana - Novosibir, Oral - Amsterdam jáne Almaty - Kýala-Lýmpýr turaqty reısteriniń, sonymen qatar Almaty - Antalııa, Astana - Antalııa, Astana - Qostanaı - Gannover charterli reısteriniń ashylýyn atap ótilgen. Sondaı-aq kelesi jyldyń perspektıvasy retinde kompanııa áýe kemeler parkin nyǵaıtýǵa kúsh jumsamaq. Osyǵan oraı Fokker-50, Embraer-190 jáne A-320 ushaqtaryn satyp alýdy kózdep otyr.
«Skat» avıakompanııasy» AQ-nyń dırektory Vladımır Denısovtiń aıtýynsha, kompanııanyń áýe kemeler parkin jańartý baǵdarlamasy boıynsha osy jyly úsh Boıng áýe kemelerin satyp alynyp, AN-24 úlgidegi kemelerdi paıdalanýdan shyǵarý jumystary kezeń-kezeńimen júrgizilmek. Qazirdiń ózinde aǵymdyǵy 10 aıdyń júk tasymaly ótken jylmen salystyrǵanda 12030 myń tonna shaqyrymǵa ulǵaıǵan. Kompanııanyń eseptik merzim boıynsha kirisi 9 mln. 951 myń teńgeni quraǵan. V.Denısov mınıstrge tarıftik saıasat jaıynda da baıandady.
Al «Astana halyqaralyq áýejaıy» AQ-nyń prezıdenti Aıbol Bekmuhambetov áýejaılardy basqarý boıynsha Malazııalyq holdıngpen aradaǵy kelisim-shartty buzý astanalyq áýejaıdyń qyzmetinde oń nátıje berip, jańa is-qımyldarǵa jol ashatyndyǵyn atap ótken. Sonymen qatar áýejaıdaǵy qyzmet kórsetý deńgeıiniń edáýir joǵarylaǵandyǵyn, óndiristik kórsetkishteri ótken jyldyń kórsetkishteri deńgeıinde turǵandyǵyn jetkizgen.
Kezdesý sońynda Kólik jáne kommýnıkatsııa mınıstri avıakompanııalar basshylaryna tarıftik saıasat jáne jolaýshylarǵa qyzmet kórsetý salasyn jaqsartýdy, sonymen qatar avıaparkterdi qarqyndy túrde jańartýdy tapsyrdy.
