Kólik jáne kommýnıkatsııa mınıstri Berik Kamalıev jańa jyljymaly kóliktik baqylaý beketteri avtomobılderiniń kiltterin tapsyrdy
ASTANA. 14 jeltoqsan. QazAqparat. 2011 jylǵy 14 jeltoqsanda QR kólik jáne kommýnıkatsııa mınıstri Berik Kamalıevtiń qatysýymen jyljymaly kóliktik baqylaý beketterin (qajetti baqylaý-ólsheý qurylǵylarymen jabdyqtalǵan avtomobılder) Kóliktik baqylaý komıtetiniń óńirlik bólimshelerine tapsyrý rásimi ótti. Mınıstr sý jańa 8 avtomobıldiń kiltin tabystady, dep habarlaıdy mınıstrliktiń baspasóz qyzmeti.
Jyljymaly (mobıldi) beketterdiń jumysy jolaýshy jáne júk tasymalynyń qaýipsizdigin, avtokólik quraldaryn naqty jáne sapaly tekserý arqyly avtomobıl joldary jelisiniń saqtalýyn qamtamasyz etýge, jolaýshylardy zańsyz jerlerden jóneltýdi anyqtaýǵa, sondaı-aq, kólik zańnamasy talaptarynyń buzylýy jaıly túsken ótinishterge baılanysty jedel túrde shara qoldanýǵa baǵyttalǵan.
Sonymen qatar, jyljymaly kóliktik baqylaý beketteri sheteldik tasymaldaýshylar tarapynan tirkeletin kóliktik zańnamalardy, sonyń ishinde ruqsat berý júıesiniń talaptaryn buzý faktilerin anyqtaýǵa jáne boldyrmaýǵa múmkindik beredi.
Máselen, sheteldik tasymaldaýshylar Qazaqstan Respýblıkasy aýmaǵyna, sondaı-aq, úshinshi elden/elge arnaıy ruqsat qujattarynsyz tasymaldardy júzege asyrýǵa áreketter jasap, sol arqyly otandyq tasymaldaýshylardyń múddesine nuqsan keltirýde.
Aǵymdaǵy jyldyń basynan beri sheteldik tasymaldaýshylar (Ózbekistan, Reseı, Belarýs, Qyrǵyzstan, Túrkııa jáne Ýkraına) tarapynan 1500-den astam buzýshylyq tirkelgen.
Kóliktik baqylaý organdary qyzmetiniń tıimdiligin arttyrý maqsatynda Kólik jáne kommýnıkatsııa mınıstrligi aǵymdaǵy jyly «Sobol» avtomobıl markasy bazasynda jabdyqtalǵan 8 mobıldik keshen satyp aldy. Bul avtomobılder navıgatsııa júıesimen, ishki jáne syrtqy beınebaqylaýmen, arnaıy baǵdarlamalyq qamtamasyzdandyrýmen, elektrondyq tarazymen, tútin ólshegishpen, gazanalızatormen jáne basqa da baqylaý-ólsheý aspaptarymen jabdyqtalǵan.
Jalpy, osy avtomobılderdi satyp alýǵa respýblıkalyq bıýdjetten 120 mln. teńge kóleminde qarjy bólingen.
Jyljymaly kóliktik baqylaý beketteri negizgi kólik dálizderinde shoǵyrlanyp, kóliktik baqylaýdyń tıimdiligin arttyrýǵa múmkindik beredi.
