Kólik jáne kommýnıkatsııa eks-mınıstri Serik Álıgýjınov dúnıeden ótti

NUR-SULTAN. QazAqparat – QR Indýstrııa jáne ınfraqurylymdyq damý mınıstrliginiń ujymy 3 qazanda ómirden ótken Qazaqstannyń burynǵy Kólik jáne kommýnıkatsııalar mınıstri Serik Álıgýjınovtyń otbasy men jaqyndaryna kóńil aıtty. Bul týraly QazAqparat vedomstvonyń Telegram kanalyna silteme jasap habarlaıdy.

«Serik Qarabatyruly 1944 jyly Pavlodar oblysynda dúnıege kelgen jáne Pavlodardaǵy №2564 avtokolonna mehanıginen QR Kólik jáne kommýnıkatsııa mınıstrine deıingi uzaq eńbek jolyn júrip ótken. El úkimeti Nur-Sultanǵa kóship jatqan kezde mınıstrlikti basqardy, kólik jáne kommýnıkatsııa salasynyń júıe quraýshy kásiporyndaryn qurýdyń bastaýynda turdy», - dep jazylǵan Telegram kanaldaǵy málimette.

Zeınetkerlikke shyqqannan keıin Serik Álıgýjınov Qazaqstan Respýblıkasy avtokólik odaǵynyń basshysy boldy.

Elimizdiń saıası, áleýmettik jáne ekonomıkalyq damýyna qosqan eleýli úlesi úshin KSRO halyqtarynyń dostyǵy ordenimen, «Qurmet» jáne «Parasat» qazaqstandyq ordenderimen marapattalǵan, qalanyń áleýmettik-ekonomıkalyq damýyna sińirgen eńbegi úshin Pavlodardyń Qurmetti azamaty ataǵyn ıelengen.