Kólik zańnamasyna qyzmet kórsetý standarttaryna jáne ákimshilik kedergilerdi azaıtýǵa qatysty ózgertýler engizý kózdelýde

«QR keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasyn usyndy.  

Atalǵan zań jobasynyń negizgi maqsaty: ákimshilik kedergilerdi azaıtý, otandyq kólik salasynyń básekelestikke qabilettiligin jáne qyzmet kórsetý sapasyn arttyrý, ınfraqurylymdy  damytý, qaýipsizdikti qamtamasyz etý, sonymen birge zańnamanyń halyqaralyq kelisimder talaptarymen úndesýi.

Avtomobıl kóligi salasy boıynsha  avtomobıl joldaryn saqtaýdy qamtamasyz etý maqsatynda avtokólik quraldarynyń tolyq salmaǵy men bilikke túsetin  salmaǵyn  qozǵalys ústinde ólsheýdiń  avtomattandyrylǵan júıesin engizý usynylady. Bul óz kezeginde baqylaýdy  tolyǵymen avtomattandyrýmen qatar, sybaılas jemqorlyqqa jol bermeıdi, júk avtokólikterin 100% tirkeýge alýǵa jáne júkti jetkizý merzimi  men tasymaldyń ózindik  qunyn azaıtýǵa  múmkindik beredi.

Zańnamada  qoǵamdyq kólikterge qatysty da birqatar ózgertýler engizý usynylýda, atap aıtqanda avtovokzaldar men avtobeketterdiń, avtobýs pen taksı kólikterimen  jolaýshy tasymaldaýshylardyń biryńǵaı standarttary men elektrondyq bılet júıesin  engizý, avtovokzaldar men avtobeketter jáne taksı qyzmetin uıymdastyrýdy jergilikti atqarýshy organǵa júkteý.

Temirjol kóligi salasy boıynsha   «Qazaqstan temir joly»UK» AQ-nyń qyzmetin  tabıǵı monopolııa sanalatyn magıstraldi temirjol jelisi qyzmetin áleýetti básekeles bolyp tabylatyn tasymaldaý qyzmetinen bólý arqyly temirjol salasynyń jańa maqsatty modelin qurý usynylady.

Sonymen birge, zańnamada vokzal qyzmetteri  men jolaýshylar tasymaly qyzmetiniń  sapa standarttaryn engizý,  múgedek jandar men halyqtyń shaǵyn mobıldi toptary úshin qoljetimdikti qamtamasyz etý, elektrondyq bıletteý júıesin engizý, bıletterdiń satylymda bolmaýy jáne  alypsatarlar arqyly satylý problemalaryn  joıý sheńberinde  bılet satýdy uıymdastyrýdy reglamentteý usynylyp otyr.

Azamattyq avıatsııa salasy boıynsha  saparlardyń ushý  ýaqyty keshiktirilgen nemese keıingi qaldyrylǵan jaǵdaılarda jolaýshylarǵa tıisti qyzmet kórsetilmegeni úshin jaýapkershilikti kúsheıtý, qyzmetterdiń múgedek jandar úshin qoljetimdi bolýyn qamtamasyz etý, aerovokzaldardyń  qyzmetin reglamentteý. Bunymen qosa, ushý kezinde  ushaqta ózin ustaý tártibin buzǵan, mobıldi telefondardy paıdalanǵan jáne shylym shekken  jolaýshylardy jaýapkershilikke tartý da qarastyrylǵan.

Avıa mekemelerdiń qyzmetine  tıisti baqylaý jáne qadaǵalaý júrgizýdi qamtamasyz etý úshin sertıfıkattaýdy «Ushý qaýipsizdigin qamtamasyz etý ortalyǵy» RMK qatysýymen quzyrly organdardyń júrgizýi usynylady. Atap aıtqanda, sertıfıkattyq  tekserý  júrgizý mindeti «Ushý qaýipsizdigin qamtamasyz etý ortalyǵy» RMK-ǵa júkteletin bolady. Tekserý  qorytyndysy  boıynsha  Azamattyq  avıatsııa  komıteti  azamattyq avıatsııa sertıfıkatyn berý nemese  bermeý týraly sheshim qabyldaıtyn bolady.

Áýe tasymaly naryǵyn lıberalızatsııalaý boıynsha birinshi kezeńde 2012 jylǵy  10 shildedegi «QR keıbir zańnamalyq aktilerine ruqsat berý  qujattaryn qysqartý jáne memlekettik organdardyń baqylaý  men qadaǵalaý  fýnktsııalaryn ońtaılandyrý máseleleri boıynsha ózgerister men tolyqtyrýlar engizý týraly» QR Zańymen qazaqstandyq áýe kompanııalary arasynda  ishki áýe baǵyttaryn bólýge qatysty baıqaý uıymdastyrý alynyp tastalǵan bolatyn.

Osy zańnama boıynsha áýe tasymaly naryǵyn lıberalızatsııalaýdyń ekinshi kezeńin júzege asyrý kózdelýde. Atap aıtqanda, Azamattyq avıatsııa  komıtetinen  turaqty ishki baǵdarlardyń kestesin bekitý  fýnktsııasyn alyp tastaý. Ushýlardy oryndaý  monıtorıngi áýe qozǵalysyna qyzmet kórsetetin organdar usynǵan áýe tasymalyn brondaý jáne ushýlardy  josparlaý júıesi arqyly qamtamasyz etiledi.

Bul sharalardyń barlyǵy jolaýshylar aǵynyn arttyrýǵa, tarıfterdi tómendetýge, ushý geografııasyn  keńeıtýge,  áýejaılardyń  tabysyn kóbeıtýge septigin tıgizetin bolady.

Sý kóligi salasy boıynsha  zańnamada kemelerdi taný jáne qashyqtan baqylaý júıesin engizý, ákimshilik quqyq buzýshylyqtyń  qaýipti túrleri úshin aıyppul kólemin  ulǵaıtý qarastyrylǵan. Teńiz porttaryndaǵy  memlekettik baqylaý men qadaǵalaýdy   júzege asyrýdy «Teńiz portynyń ákimshiligi» ınstıtýtynyń joq ekenin eskere otyryp, ortalyqtandyrylǵan  túrde  QR Kólik jáne kommýnıkatsııa mınıstrliginiń Kóliktik baqylaý komıtetine berý  usynylady.

Teńizshi mamandarynyń tapshylyǵy máselesin sheshý úshin Qazaqstanda teńizshilerdi daıarlaýdyń jáne dıplom berýdiń halyqaralyq standarttaryn engizýdi kózdeıtin teńiz kóligi salasyndaǵy halyqaralyq konventsııanyń normalaryn qoldaný usynylady. Atalǵan shara qazaqstandyq oqý oryndary bergen dıplomnyń  basqa memleketterdiń terrıtorııasynda jaramdy bolýyn qamtamasyz etedi. Teńizshilerdi  daıarlaý boıynsha bilim berýdi uıymdastyrýdy sertıfıkattaýmen birge júzý  tájirıbesinen ótýdi mindetteýdi engizý  de kózdelýde.

Kólik qaýipsizdigi  salasy boıynsha ınfraqurylym nysandarynyń ıeleri men tasymaldaýshylar kólik nysandaryn ınjenerlik-tehnıkalyq quraldarmen jáne qaýipsizdik júıelerimen jaraqtandyrýdy qamtamasyz etýleri qajet jáne olardyń daǵdarystyq jaǵdaıǵa daıyndyǵy týraly josparlary bolýy tıis. Joǵaryda atalǵan talaptar saqtalmaǵan  nemese  buzylǵan jaǵdaıda zań jobasynda ákimshilik jaýapkershilik engizý qarastyrylǵan.  

Budan ózge, áýe tasymalyndaǵydaı kóliktiń barlyq túrlerinde jolaýshylardy tekserý mehanızmin engizý usynylady.  Mundaı tekserýler  zańsyz aralasý qaýpi tóngen kezde, resmı sharalar ótkizý barysynda jáne jeke tulǵalarǵa qatysty  quqyq qorǵaý organdary tarapynan  shuǵyl aqparat  túsken jaǵdaıda ǵana júrgiziletin bolady.