Kólik zańnamasymen jumys barysynda depýtattar 450-ge tarta usynys jasady - S. Súleımenov
ASTANA. 4 naýryz. QazAqparat - Májilis depýtattary «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasymen jumys barysynda 450-ge tarta usynystar men eskertpeler jasady. Bul týraly búgin atalmysh másele talqylanǵan dóńgelek ústel barysynda málim boldy.
Jıyndy ashqan Ekonomıkalyq reforma jáne óńirlik damý komıtetiniń tóraǵasy Seıitsultan Áıimbetovtiń aıtýynsha, kólik salasyna qatysty zań jobasy halyqaralyq sharttar talaptaryna sáıkes ákimshilik kedergilerdi tómendetýge, otandyq kólik salasynyń básekelestik qabiletin arttyrýǵa, ınfraqurylymdy damytýǵa jáne zańnamany úılestirýge baǵyttalǵan. «Zań jobasy boıynsha 10 jumys tobynyń otyrysy boldy jáne depýtattardyń zań jobasy normalaryn naqtylaýdy jáne jaqsartýdy kózdeıtin 450-ge jýyq eskertpesi men usynysy qaralǵan», - dedi depýtat. Onyń aıtýynsha, zań jobasymen eki aıǵa jýyq jumys barysynda depýtattar 387 usynys jasasa, onyń úkimettik nusqasyna 279 pozıtsııasy engizilgen. «Jalpy, Qazaqstannyń kólik salasy el ekonomıkasynyń damýynda mańyzdy ról atqarady. Sondyqtan, álemdik naryqqa taýarlar jetkizý jáne halyqaralyq tasymaldarda suranysty qanaǵattandyrý úshin Qazaqstannyń geostrategııalyq jaǵdaıyn jáne eldiń kólik kesheni múmkindigin paıdalaný qajet», - dedi S. Súleımenov.
