Kólik vedomstvosy Konstıtýtsııa kúni qarsańynda avıatorlardy marapattady

STANA. Tamyzdyń 26-sy. QazAqparat. Búgin Kólik jáne kommýnıkatsııa mınıstrliginde Qazaqstan Respýblıkasynyń Konstıtýtsııasy kúni qarsańyńda Uly Otan soǵysyndaǵy Jeńistiń 65-jyldyǵyna oraı ótkizilgen avıasherýge qatysqan «Memlekettik avıatsııalyq ortalyq» RMK-nyń (MAO) qyzmetkerleri marapattaldy.

Qazaqstan Respýblıkasy kólik jáne kommýnıkatsııa mınıstri Ábilǵazy Qusaıynov atalǵan mańyzdy sharaǵa belsene qatysqandary úshin 6 ekıpaj múshelerine jáne marshrýt boıymen ushýdy qamtamasyz etken ınjenerlik-tehnıkalyq quramyna ataýly saǵattar tapsyrdy, dep habarlady vedomstvonyń baspasóz qyzmeti.

Bıyl sáýirdiń 28-nen mamyrdyń 4-ne deıin sozylǵan bundaı avıasherý respýblıka tarıhynda birinshe ret ótkizilgen bolatyn. Sapar Astana qalasy mańyndaǵy Jolaman alańynan bastaldy, budan ári marshrýt Qaraǵandy, Pavlodar, Semeı, Taldyqorǵan, Almaty, Taraz, Shymkent, Túrkistan, Qyzylorda, Aqtóbe, Aqtaý, Atyraý jáne Oral qalalary arqyly ótti. Ol jaqtan avıasherý bastapqy ushý alańyna Qostanaı men Kókshetaý arqyly oraldy.

Sonymen, 7 kún ishinde alty ushaqtan turatyn top 8300 shaqyrym arany ótip, ár ushaq áýe keńistiginde 48 saǵat 30 mınýttan boldy.

Ushaqtar qonǵan eldi mekenderde aǵa býynǵa perzenttik alǵysyn bildirý, bolashaq avıatorlardy patrıottyq rýhta tárbıeleý jáne kásip tańdaýǵa kómektesý maqsatynda Uly Otan soǵysynyń ardagerleri men jastarmen kóptegen kezdesýler uıymdastyryldy.

Anyqtamalyq: «Memlekettik avıatsııalyq ortalyq» RMK 2006 jylǵy 17 qarasha aıynda azamattyq avıatsııaǵa, sondaı-aq Qazaqstan Respýblıkasy Qarýly Kúshteriniń Áýe qorǵanysy kúshteriniń Áskerı ınstıtýty úshin áskerge shaqyrylatyn jastardy ushqyshtar quramynyń bastapqy ázirligine tıisti baza jasaý maqsatynda qurylǵan bolatyn.