Kólik urlaýshy alysqa uzaı almady
ALMATY. Tamyzdyń 9-y. QazAqparat - Bul joly Almaty polıtseılerine Áýezov aýdanyndaǵy turǵyn úılerdiń mańynan urlanǵan «BMV» avtokóligin izdestirýge týra keldi. Kólik ıesiniń málimetine qaraǵanda, bul oqıǵa ol dúkenge kirip ketken jarty saǵat ishinde oryn alǵan, dep habarlaıdy ІІD baspasóz qyzmetinen.
«Bul kúnderi Almatyda krımınaldyq jaǵdaıdy qalypqa keltirýge baǵyttalǵan «Quqyq tártibi» atty keńeıtilgen arnaıy jedel aldyn alý is-sharasy júrgizilýde. Osy negizde kúndelikti oryn alatyn qylmystardyń aldyn alý jáne izin kesý maqsatynda qala kóshelerine quramynda krımınaldyq polıtsııanyń tájirıbeli mamandary men qosa jol polıtsııasy ınspektorlary jáne jedel áreket etý jasaǵynyń sarbazdary bar 20-dan asa «Foton» túngi izdestirý toby qala tártibin qamtamasyz etedi. Al joǵaryda kórsetilgen qylmystyq is osyndaı izdestirý tobynyń arqasynda ashylyp otyr», - dedi Almaty qalasy ІІD Krımınaldy polıtsııa basqarmasy bastyǵy, polıtsııa polkovnıgi Amangeldi Shiderqulov.
Polıtseıler nazaryn Jandosov kóshesimen Qaskeleńge qaraı baǵyt alyp bara jatqan eski avtokólik aýdarǵan. Ol polıtseıler kóligin kóre salysymen jyldamdyǵyn arttyryp iz jasyrýǵa nıettengen. Polıtsııa quryǵynan qutylyp ketpekshi bolǵan ol aldynda ketip bara jatqan «Sýbarý» kóligimen soqtyǵysyp qalady. Alaıda qylmyskerdi bul da toqtata alǵan joq edi.
«Foton» ekıpajy ózderiniń áriptesterine habarlasyp, qylmysker jolyna tosqaýyl qoıýdy ótinedi. Kólik tizginine ishkilikke sylqııa toıyp alyp otyrǵan bul azamat quryqtaý kezinde tártip saqshylaryna baǵynbaı qarsylyq kórsetti. Sonymen qatar ol temir tulparynyń birde-bir qujatyn kórsete de almady. Qazirgi kezde bul azamatqa katysty ózgeniń múlkin ıemdengeni úshin ashylǵan qylmystyq is Áýezov aýdandyq ІІB-de egjeı-tegjeıli tekserilýde», - dep atap kórsetti Amangeldi Shiderqulov.
