Kólik tóbesine adam otyrǵyzǵan júrgizýshi jaýapqa tartyldy
TÚRKІSTAN. QazAqparat - Túrkistan oblysynyń polıtseıleri kóliginiń ústine birneshe adamdy otyrǵyzyp, jol júrgen júrgizýshini Ákimshilik kodekstiń tórt babymen jaýapqa tartatyn boldy, dep habarlaıdy QazAqparat Polisia.kz silteme jasap.
VAZ-2106 avtokóliginiń ústinde birneshe adamnyń otyryp alǵan beınejazbasy áleýmettik jelide taraǵan bolatyn. Polıtsııa júrgizýshiniń aıty-jónin anyqtady.
Teksere kele Ordabasy aýdanynyń turǵyny 1 naýryz kúni kólik tizgininde otyrǵan saıramdyq azamatqa mashınasyn satqany belgili boldy. Sóıtip tártip saqshylary avtokóliktiń jańa ıesine QR Ákimshilik quqyq buzýshylyq týraly kodekstiń tórt baby boıynsha hattama toltyrdy: 230-baby – «Qazaqstan Respýblıkasynyń mindetti saqtandyrý týraly zańnamasyn buzý», 590-baby – «Kólik quraldaryn paıdalaný qaǵıdalaryn buzý», 593-baby – «Jol júrisi qaǵıdalarynda jolaýshylardy jáne júkterdi tasymaldaý, qaýipsizdik beldikterin nemese motoshlemderdi paıdalaný jónindegi talaptardy saqtamaý», 612-baby – «Qujattary joq jáne basqarý quqyǵy joq adamnyń kólik quralyn basqarýy».
Kólik tizgininde bolǵan azamat óziniń áreketi zańsyz ekenin jáne jolaýshylardyń ómirine qaýip tóndirgenin moıyndap, keshirim surap, aldaǵy ýaqytta qaıtalamaıtynyn aıtty.
