Kólik termınaly aqshańyzdy «jutyp qoısa» ne isteý kerek
ASTANA. QazAqparat - Kólik kartasyn termınal arqyly toltyrǵanymen, aqsha túspegen jaǵdaıda jolaýshy ótinish jazyp, aqshasyn 48 saǵattyń ishinde qaıtaryp ala alady. Bul týraly qala ákimdiginde ótken baspasóz máslıhatynda «Astana LRT» JShS tólem júıesi departamentiniń dırektory Dáýren Nurálıev málim etti, dep habarlaıdy QazAqparat tilshisi.
«Bizde RTVM termınaldarda aqsha salynǵanymen, ártúrli sebeptermen kólik kartasyna tqlemniń túspeı qalǵan jaǵdaılary tirkelgen. Eger termınaldaǵy belgili bir qyzmetti durys júrgizbegen jaǵdaıda sáıkesinshe, aqsha túspeı qalýy múmkin. Mundaı jaǵdaıda álgi adam kassaǵa jaqyndap, ótinish jazyp, belgili bir ýaqyttan keıin aqshany qaıtaryp ala alady», - dedi ol ákimdikte ótken brıfıngte.
Dáýren Nurálıev atalmysh jaǵdaıdy jaqsartý baǵytynda da qadamdar jasalǵanyn sóz etti.
«Búginnen bastap júıege ózgeris engizdik. Jolaýshy termınalda kóliktik kartasyn toltyrǵanymen, aqsha túspese túbirtegi arqyly oǵan 48 saǵattyń ishinde aqshasy qaıtarylyp beriledi», - dedi kompanııa ókili.
«Astana LRT» JShS qyzmetkeri sondaı-aq, termınaldardyń qaǵaz aqshany qabyldamaý jaǵdaıyna qatysty pikirin bildirdi.
«Bizdiń qalada qazirgi tańda 30 RTVM termınal (kólik kartasyn tolytratyn) bar. Onyń 13-i syrtta, ıaǵnı aıaldamalardyń qasynda tursa, 17-i túrli oıyn-saýyq ortalyqtarynda ornalasqan. Bular qysta da yńǵaıly, sebebi bul termınaldar 2016 jyldyń qarasha aıynan bastap tur», - deıdi Dáýren Nurálıev.
Onyń aıtýynsha, kompanııa qazirgi tańda termınaldardy jańartý jaǵyn qarastyryp jatqan joq.
«Sebebi, termınaldardyń baǵasy óte qymbat bolǵandyqtan, aldyńǵy jumada ótken dóńgelek ústelde aıtylǵanyndaı, kólik kartasyn jyldam toltyrýdyń jańa ádisterin (QR-kod arqyly) taptyq. Ol týraly aıtylyp ta jatyr. Jeltoqsan aıynyń alǵashqy onkúndiginde biz qala boıynsha júzge jýyq agenttik, ıaǵnı pýnkterdi ashpaqpyz. Termınalmen qazir qalaı toltyrsańyz, ol pýnkterde de kelgen mezette toltyrý múmkindigin beredi», - dedi Dáýren Nurálıev.
