Kólik terezesin syndyryp, qoqan-loqqy kórsetken júrgizýshi ustaldy
Joldy bólise almaǵan kólikterdiń biriniń júrgizýshisi, ekinshi kóliktiń aldyńǵy shynysyn teýip syndyrady, keıin oń jaqtaǵy terezeni judyryǵymen shaǵyp, júrgizýshige qoqan-loqy kórsetedi. Vıdeoda áıeldiń kólik ishinde bala otyrǵanyn aıtyp, aıǵaılaǵan daýysy estiledi.
Polıtsııa málimetine sáıkes, er adam ustalyp, tergeý bastaldy.
«Jambyl aýdanynyń polıtsııa qyzmetkerleri kúdiktini ustady. Ol Almaty qalasynyń 1993 jyly týǵan K. esimdi turǵyny bolyp shyqty», polıtsııa aqparatynda.
28 maýsym kúni Jambyl aýdanynyń polıtsııa bólimine 1992 jyly týǵan O. esimdi azamat «Almaty-Bishkek» avtojolynda saǵat 19:20 shamasynda jol qozǵalysy erejelerin buzyp, jol-kólik oqıǵasyn jasaǵan, sonymen qatar buzaqylyq nıetpen kóligin búldirgen belgisiz adamǵa qatysty sharalar qabyldaýdy surap, aryzben júgindi.
«Derek QR Qylmystyq kodeksiniń 293-baby 1-bóliginde kózdelgen qylmystyq quqyq buzýshylyq belgileri boıynsha birden aýdandyq polıtsııada tirkeldi. Jábirlenýshige sot-medıtsınalyq saraptama taǵaıyndaldy. Kúdiktiniń avtomashınasy Uzynaǵash aýylynyń arnaıy aıyp turaǵyna qoıyldy. Jol-kólik oqıǵasy faktisimen QR Ákimshilik quqyqbuzýshylyq týraly kodekstiń 610-baby 1-bóligi boıynsha K. esimdi júrgizýshige qatysty ákimshilik is qozǵaldy», - delingen habarlamada.
Málim etilgendeı, buzaqylyq faktisimen túpkilikti is júrgizý sheshimin qabyldaý úshin tergeý is-sharalary júrgizilip jatyr.
