Kólik sharýashylyǵy elimizdiń jalpy ishki óniminiń 7,3 paıyzyn qamtamasyz etip otyr

Búgin Parlament Májilisinde kólik ınfraqurylymyn damytý máselelerine arnalǵan Úkimet saǵatynda Ekonomıkalyq damý jáne óńirlik reforma komıtetiniń tóraǵasy Seıitsultan Áıimbetov osylaı málim etti.

Depýtattyń aıtýynsha, ekonomıkanyń iri bazalyq salalarynyń biri retinde kólik ınfraqurylymyn damytý el ekonomıkasyn arttyrýdyń mańyzdy faktorlarynyń biri bolyp tabylady. «Sondyqtan da, keıingi jyldary ınfraqurylymdy jańǵyrtý boıynsha aýqymdy jumys atqaryldy, qarqyny áli de artyp keledi. Elbasy byltyrǵy Joldaýynda da kólik ınfraqurylymy ekonomıkalyq múmkindikterdi keńeıtýge tıis ekenin aıtqan bolatyn. Búgingi tańda kólik sharýashylyǵy eldiń jalpy ishki óniminiń 7,3 paıyzyn qamtamasyz etip otyr. Bul salada 572 myń adam jumys istep jatyr», - dedi komıtet tóraǵasy.

Onyń aıtýynsha, búgingi kúni kólik salasyn damytýda jaǵymdy kórsetkishterge qol jetkizip kelemiz. Alaıda, soǵan qaramastan áli de keıbir sheshimin tappaı otyrǵan máseleler barshylyq. Al depýtattyń paıymynsha, bular salanyń damý tıimdiligine keri áser etip otyr. Máselen, onyń sózine qaraǵanda kólik ınfraqurylymyndaǵy servıstiń jaı-kúıi áli de qanaǵattandyrmaıdy. Tarıf saıasaty da jetilmegen. Ǵylymı-tehnıkalyq ázirlemeler men ınnovatsııalyq tehnologııalardy engizý tetikteri damymaı jatyr. «Injenerlik-tehnıkalyq mamandyqtar boıynsha kadrlar da tapshy. Baqylaý deńgeıi de aıtarlyqtaı emes dep aıtýǵa bolady», - dedi depýtat S. Áıimbetov.