Kólik satý týraly jalǵan habarlandyrýlar jarııalaǵan Kókshetaý turǵyny ustaldy
Búgingi tańda kúdiktiniń alaıaqtyqtyń úsh faktisine qatysy bar ekeni anyqtaldy, al jábirlenýshiler elimizdiń ár óńiriniń turǵyndary bolyp shyqty.
Osy jyldyń úsh aıy ishinde Kókshetaý polıtsııasyna avtokólikterdi satý týraly jalǵan habarlandyrýlar ornalastyrǵan ınternet-alaıaqtardyń áreketinen zardap shekken azamattardan birneshe ótinish túsken.
«Tartymdy» baǵaly avtokólikti satý týraly usynysty jábirlenýshiler Kolesa.KZ tanymal jarnama saıtynan kórip, keıin kólik ıesimen baılanysqa shyqqan.
Almatynyń 33 jastaǵy turǵynynyń aıtýynsha, ol Hyundai Tucson avtokóligin satyp almaq bolyp habarlandyrý avtorymen baılanysyp, satyp alý-satý mámilesi týraly keliskennen keıin ıesi habarlandyrýdy saıttan alyp tastaý úshin aldyn ala tólem jasaýdy ótingen. Kelinshek kórsetilgen shotqa 50 myń teńge aýdarǵan soń kólik ıesi baılanysqa shyǵýdy toqtatqan.
Osyǵan uqsas ótinishter Almaty oblysy men Qaraǵandy qalasynyń turǵyndarynan tústi. Barlyq derekter boıynsha polıtseıler QR QK-niń 190-baby (Alaıaqtyq) boıynsha sotqa deıingi tergep-tekserýdi bastady. Kıberqylmyspen kúres bóliminiń qyzmetkerleri jedel-izdestirý is-sharalary keshenin ótkizdi, nátıjesinde jalǵan habarlandyrýlardyń avtory – Kókshetaýdyń 27 jastaǵy turǵyny ustaldy.
Ustaý kezinde jedel qyzmetkerler zattaı dálel retinde uıaly telefondar men 60 SIM kartany taýyp alyp, tárkiledi. Polıtseıler uıaly telefondardy teksergen kezde quny 17,2 mln teńge bolatyn avtokólikti satý týraly jalǵan habarlandyrý ornalastyrylǵan akkaýnt taýyp aldy. Qazirgi ýaqytta jábirlenýshige qatysty qajetti tergeý sharalary júrgizilýde, alaıaqtyq áreketterden zardap shekken basqa jábirlenýshiler belgilenip jatyr.
