Kólik satpaq bolǵan Semeı turǵyny alaıaqqa aldanyp qaldy
ÓSKEMEN. QazAqparat – Semeı qalasynyń turǵyny kólik satamyn dep alaıaqtyń tuzaǵyna túsken, dep habarlaıdy QazAqparat tilshisi.
Shyǵys Qazaqstan oblystyq Polıtsııa departamenti baspasóz qyzmetiniń málimetine súıensek, 12 tamyzda polıtsııaǵa habarlasqan 49 jastaǵy azamat mamyr aıynyń sońynda beıtanys bireýge «Mersedes» markaly avtokóligin satqanyn aıtqan.
Olar kólik baǵasyna kelisken soń, satyp alýshy aqshany bólip tóleýdi ótinipti. Eshteńeden kúdiktenbegen kólik ıesi bul usynysqa kelise salǵan. Alaıda arada biraz ýaqyt ótkende aılasyn asyrǵan alaıaq múlde habar-osharsyz ketken. Aldanyp qalǵanyn túsingen er adam tártip saqshylarynan kómek surady.
«Jedel-izdestirý sharalary barysynda polıtseıler kúdiktini anyqtap, qolǵa túsirdi. Besqaraǵaı aýdanynyń 18 jastaǵy turǵyny sol kólikti satyp jiberip, aqshany qaltaǵa basqan. Qazirgi ýaqytta QR Qylmystyq kodeksiniń 190-baby 1-bóligi (Alaıaqtyq) boıynsha sotqa deıingi tergeý amaldary júrgizilýde», - deıdi ShQO Polıtsııa departamentiniń bastyǵy Saǵat Mádıev.
