Kólik salyǵyn MKK portalynda esepteýge bolady

NUR-SULTAN. QazAqparat - Azamattardan ótinishterdiń kóptep túsýine baılanysty Memlekettik kirister komıteti kólik quraldary salyǵyn qalaı ońaı esepteýge bolatynyn eske saldy, dep habarlaıdy QazAqparat, QR Qarjy mınıstrligi Memlekettik kirister komıtetiniń baspasó qyzmetine silteme jasap.

Ol úshin Komıtettiń www.kgd.gov.kz portalyndaǵy kalkýlıatordy ashyp, onda salyq kezeńin, kólik quralynyń túrin jáne qozǵaltqysh kólemin kórsetse boldy. Elektrondy servıs tıisti salyqty ózi eseptep beredi.

Kalkýlıator portaldyń negizgi ekranyndaǵy «Elektrondy servıster» bóliminde ornalasqandyqtan, ony jyldam tabýǵa bolady.

«Bıylǵy jyldan bastap engizilgen ózgeristerge sáıkes, jeke tulǵalardyń 2020 jylǵa arnalǵan kólik salyǵyn 2021 jyldyń 1 sáýirinen keshiktirmeı tóleý kerek», -dep habarlaıdy Komıtettiń baspasóz qyzmeti.

Osyǵan oraı, ósimpuldardy esepteý algorıtmi de qaıta qaralǵan.

Eske sala keteıik, osyǵan deıin Memlekettik kirister komıteti 2020 jylǵy 31 jeltoqsanda jeke tulǵalarǵa múlik, jer jáne kólik salyqtary boıynsha salyqtyq raqymshylyq aıaqtalǵanyn habarlap, osy múmkindikti elimizdiń 1 mln.-nan astam azamaty qoldanǵanyn jáne olardyń 2 mlrd. teńge somasyndaǵy salyqqa qaryzdary keshirilgenin jetkizgen bolatyn.