Kólik salasynyń básekesi artyp, qyzmet kórsetý sapasy joǵarylaıdy
ASTANA. 11 maýsym. QazAqparat - Búgin Parlament Senatynyń Ekonomıkalyq damý jáne kásipkerlik komıtetinde keńeıtilgen otyrys bolyp ótti. Onda depýtattar «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasyn talqylady.
Atalǵan zań jobasy elimizdegi kólik ınfraqurylymyn damytý jónindegi 2010-2014 jyldarǵa arnalǵan baǵdarlamanyń erejelerin iske asyrý maqsatynda ázirlengen. Zań jobasy ákimshilik kedergilerdi tómendete otyryp, otandyq kólik salasynyń básekege qabilettiligin, qyzmet kórsetý sapasyn arttyrýǵa baǵyttalady. Budan bólek qujat ınfraqurylymdy damytýdy, tutynýshylardyń quqyn qorǵaýdy, kóliktegi qaýipsizdikti qamtamasyz etýdi zań normalary aıasynda kózdeıtin bolady.
Sonymen qatar qujat arqyly avıatsııa, temirjol, avtokólik salalarynda, ishki sý kóligi jáne saýda maqsatynda teńizde júzý salasyndaǵy zańnamany jetildiredi.
Atap aıtsaq, azamattyq avıatsııa salasy boıynsha zańnamaǵa 40-qa jýyq ózgertý usynylǵan. Onyń ishinde ınspektorlardyń mártebesin zań deńgeıinde bekitý qarastyrylady. Bul ushý qaýipsizdigin qadaǵalaý men baqylaýdy kúsheıte túsedi.
Zań jobasy Palatanyń jalpy otyrysyna shyǵarylady.
