Kólik salasynyń 30 qyzmetkeri tártiptik jaýapkershilikke tartyldy
ASTANA. 16 aqpan. QazAqparat - Kólik salasynyń 30 qyzmetkeri tártiptik jaýapkershilikke tartyldy, dep habarlaıdy Kólik jáne kommýnıkatsııa mınıstrliginiń baspasóz qyzmeti.
Kólik salasynyń qyzmetkerlerine qatysty mundaı sheshim QR Bas prokýratýrasynyń memlekettik satyp alý týraly zańnamasynyń saqtalýyna jáne 2009-2011 jyldarǵa arnalǵan avtomobıl joldaryn salýdy, qaıta salýdy, jóndeý jumystaryn júrgizýdi iske asyrý kezinde qabyldanǵan kelisim-sharttardyń oryndalýyna tekserý júrgizý nátıjesinde qabyldanyp otyr.
Kólik jáne kommýnıkatsııa mınıstri Asqar Jumaǵalıev atalǵan faktilermen jan-jaqty tanysyp, qajetti sharalar qabyldaýdy tapsyrdy.
Memlekettik satyp alýdy ótkizý jáne uıymdastyrý kezinde bıýdjet qarajatyn negizsiz jáne tıimsiz jumsaǵandary, merdiger kompanııalardyń óndiriste standarttar men norma buzýshylyqtarǵa jol bergeni, jol-qurylys jumystary sapasynyń tómendigine qatysty eskertýler boıynsha kólik salasynyń birqatar qyzmetkerlerine tártiptik sharalar qoldanyldy.
Avtomobıl joldary komıteti tóraǵasynyń orynbasary men 6 dırektoryna, dırektorlardyń 4 orynbasaryna jáne Avtomobıl joldary komıtetiniń oblystyq departamentteriniń 10 qyzmetkerine, «Obljollaboratorııa» MM 7 dırektoryna, «Qazaqavtojol»RMK Bas dırektoryna, «Qazaqavtojol»RMK oblystyq bólimsheleriniń 3 dırektoryna sógis pen eskertýler jarııalandy.
Sonymen birge, Avtomobıl joldary komıtetiniń oblystyq departament dırektory men dırektordyń orynbasary qyzmetterinen bosatyldy.
