Kólik saqshylary ulttyq qundylyqtardy ulyqtap, dástúrimizdi dáriptedi
Departamenttiń ádemi bezendirilgen akt zalynda «Qosh keldiń, Áz Naýryz!» teatrlandyrylǵan kórinis qoıyldy.
Ulttyq naqyshtaǵy kıiz úı maketteri onda qoıylǵan turmystyq buıymdar is-sharanyń shyraıyn kirgizdi. Túrli dámge toly dastarhan, naýryz kóje, et pen qymyz, qurt pen irimshik qazaq halqynyń qonaqjaılylyǵyn dáriptedi.
Departamenttiń baspasóz qyzmeti málim etkenindeı, kúndelikti qyzmette polıtseı formasyn kıetin saqshylar búgin barlyǵy ulttyq kıimmen keldi.
Dúbirli jıyndy ashqan Kóliktegi PD bastyǵy Ońal Bekeev jeke quramdy Ulystyń uly kúnimen quttyqtap, izgi tilegin bildirdi.
Mereke barysynda departamenttiń apparat qyzmetkerleri ultymyzdyń salt-dástúrlerinen kórinis kórsetý boıynsha «Yntymaq», «Dostyq» jáne «Bereke» aýyldary bolyp úsh topqa bólinip, synǵa tústi.
Qazylar alqasynyń sheshimimen «Besikke salý», «Tusaý kesý», «Betashar», «Bata berý» syndy halqymyzdyń tamasha joralǵylaryn nasıhattaı bilgen qyzmetkerler jeńimpaz atandy. Sondaı-aq «Eń úzdik qazaq úı», «Eń úzdik ulttyq kıim», «Eń úzdik kórsetilim», «Eń úzdik dastarhan» atalymdary boıynsha ozyq shyqqandar anyqtaldy.
Departament bastyǵy, polıtsııa general-maıory O.Bekeev Birhanym esimdi sábıdiń tusaýyn kesip, aq batasyn berdi.
Merekelik is-shara aıasynda ánder shyrqalyp, kúıler tartyldy. Toıdyń sánin «qol kúresi», «arqan tartý», «kir kóterý» sekildi ulttyq oıyndar asha tústi.
Merekege arnaıy kelgen kóliktegi ishki ister organdarynyń ardagerleri astan dám tatyp, bir-birimen áńgimelesip, ózderinen keıingi býynǵa aq tilekterin jetkizdi.
Osylaısha Naýryz merekesin eldik pen jasampazdyqtyń belgisindeı erekshe ulyqtady.
