Kólik prokýrorlary jyl basynan beri 14 myńǵa tarta azamattyń konstıtýtsııalyq quqyǵyn qorǵady
ASTANA. 17 shilde. QazAqparat - Elimizdiń Bas kólik prokýratýrasy aǵymdaǵy jyldyń ótken alty aıy boıynsha jumys qorytyndylaryn shyǵardy. Bas kólik prokýrorynyń orynbasary Asylbek Ábdiraıymovtyń jasaǵan eseptik baıandamasyna sáıkes, prokýratýramen osy kezeń ishinde 15 myńǵa tarta zańdylyqtyń buzylǵany anyqtalyp, qadaǵalaý organynyń aktilerimen zańsyz dep tanylǵan 663 aktiniń kúshi joıylǵan. Bul týraly Bas kólik prokýratýrasynyń baspasóz qyzmetinen habarlandy.
Sonymen qatar, esepti kezeńde 13 848 azamattyń konstıtýtsııalyq quqyǵy qorǵalyp, ár túrli jaýapkershilikke 3141 tulǵa tartyldy, 24 qylmystyq is qozǵalǵan.
«Ótken alty aıda memleketke keltirilgen shyǵyn somasy 3 mlrd. 500 mln. teńge shamasynda aıqyndaldy, onyń ishinde 1 mlrd. 300 mln. teńge memlekettik bıýdjetke qaıtaryldy. Sonymen qatar, munaı men munaı ónimderiniń zańsyz aınalymyn anyqtaý men aldyn alý jumystary belsendi júrgizildi. Bul baǵytta kólik prokýrorlary 6 qylmystyq isti qozǵady» delingen baspasóz baıanynda.
