Kólik prokýrorlary temirjol bıletteriniń qunyn tómendetýdi kózdep otyr

ASTANA. QazAqparat – Qazaqstannyń Bas kólik prokýratýrasy temirjol bıletteriniń qunyn tómendetýdi kózdep otyr, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

«Bas kólik prokýratýrasy josparly taldaý sheńberinde kólik salasyndaǵy ýákiletti organnyń «Áleýmettik mańyzy bar qatynastar boıynsha jolaýshylardy tasymaldaý jónindegi qyzmetterge baǵalardyń (tarıfterdiń) shekti deńgeılerin aıqyndaý ádistemesin bekitý týraly» buıryǵyn (budan ári - Ádisteme) zerdeledi.

Ádistemege dınamıkalyq baǵa belgileý prıntsıpi boıynsha jol júrý qunyn anyqtaý formýlasy zańsyz engizilgeni anyqtaldy, bul is júzinde jol júrý qujat baǵasynyń qymbattaýyna múmkindik bergen.

Osy normatıvtik aktige bıylǵy 21 aqpanda Bas kólik prokýratýrasy Indýstrııa jáne ınfraqurylymdyq damý mınıstrligine narazylyq keltirdi, ol tolyq kólemde qanaǵattandyryldy»,-delingen habarlamada.

Sonymen qatar onda búgingi tańda temirjol bıletterin satý kezinde dınamıkalyq baǵa belgileýdi qoldaný toqtatyldy, osy normany alyp tastaý týraly buıryqtyń jobasy ýákiletti organdarmen kelisilý satysynda ekeni aıtylǵan.

Prokýratýra bastamashylyǵymen engizilgen túzetýler jolaýshylarǵa poıyzdarda júrý qunyn edáýir tómendetýge jáne bıletterdiń shekti baǵasyn belgileýge múmkindik beredi.