Kólik prokýratýrasy zańnamaǵa avıakompanııalarda rezervti borttardyń mindetti bolýy týraly ózgeris engizýdi usynady
ASTANA. 26 shilde. QazAqparat /Qanat Mámetqazyuly/ - QR Bas kólik prokýratýrasy Kólik jáne kommýnıkatsııalar mınıstrliginiń Azamattyq avıatsııa komıtetimen, Tabıǵı monopolııalardy retteý agenttigimen birlese otyryp, qazaqstandyq avıatasymaldaýshylardyń tutynýshylar quqyn qorǵaý máseleleri boıynsha tekserister júrgizdi.
Bul týraly QR Bas prokýratýrasy baspasóz qyzmetinen habarlandy.
Tekserý qorytyndylaryna sáıkes, ushaqtardyń ushý kestesindegi kidiris faktileriniń basym bóligi «Eır Astana» AQ avıakompanııasynyń reısterin atqarý barysynda oryn alǵany anyqtaldy. Máselen, 2010 jyly atalǵan avıakompanııamen oryndalǵan 27776 reıstiń 5806-synda, ıaǵnı 20 paıyzynda ushý ýaqyty kidirgen bolsa, 2645 reısterdegi kidiris ýaqyty 1 saǵattan artyq merzimdi quraǵan.
Al 2011 alǵashqy jartyjyldyǵyna sáıkes, 15351 atqarylǵan reıstiń 2976-ynda ushý ýaqyty shegerilgen, bul 19 paıyzǵa teń. Ushý merzimi 1 saǵattan artyq ýaqytqa keıinge sozylǵan reıster sany atalǵan kezeńde 1224-ti quraǵan.
«Sonymen qosa, aýa raıynyń qolaısyzdyǵy sekildi obektıvti sebeptermen reısterdiń aıtarlyqtaı bóligi kidirip jatatyny anyqtaldy. Sondyqtan da, aldyńǵy reıstegi áýe kemesiniń ýaqytynan keshigip kelýine oraı odan keıingi ushý merzimderi de avtomatty túrde shegerilip otyrǵan. Máselen, 2010 jyly bundaı kórsetkish 45,3 paıyzdy qurasa, 2011 jyly 40 paıyzǵa jetken. Osyǵan oraı, prokýratýra qoldanystaǵy zańnamaǵa bundaı jaǵdaıǵa qatysty rezervti borttardyń mindetti bolýy týraly ózgerister men tolyqtyrýlar engizý týraly usynys ázirleýde», - delingen baspasóz aıǵaǵynda.
Áýe kóliginde qyzmetterdi tutynýshylar quqynyń qorǵalýyna qatysty tekserister jalǵasýda. Bundaı shara barysynda ushý bıletterine baǵanyń qalyptasýy, jolaýshylardy tamaqtandyrýdy uıymdastyrý, áýejaı qyzmetteri sekildi servıstik máseleler de prokýratýra organdarymen zerdelenetin bolady.
