Kólik prokýratýrasy 200 mln teńgeniń kontrabandalyq taýaryn tárkiledi
ALMATY. QazAqparat – Jetisý kólik prokýratýrasy asa iri mólsherdegi ekonomıkalyq kontrabandanyń jolyn kesip, 198 mln teńgeniń taýaryn tárkiledi, dep habarlaıdy QazAqparat tilshisi.
«D» JShS deklaratsııaǵa jalǵan málimetterdi kórsetý arqyly Qytaıdan Qazaqstan aýmaǵyna 198,8 mln teńgege, salmaǵy 156 tonna kólik quraldarynyń qosalqy bólshekterin alyp kirmekshi bolǵany anyqtaldy.
«Atalǵan fakti kólik prokýratýrasynda tirkelip, qujattar protsessýaldyq sheshim qabyldaý úshin Almaty qalasynyń ekonomıkalyq tergeý departamentine joldandy. Onda Qylmystyq kodekstiń 234-babynyń 2-bóligi boıynsha (asa iri mólsherdegi ekonomıkalyq kontrabanda) sotqa deıingi tergep-tekserý júrgizildi», - delingen vedomstvo habarlamasynda.
21 qańtar kúni Almaty qalasy Túrksib aýdandyq soty azamat S.-ǵa qatysty isti kelisimdik is júrgizýde qarap, ony kináli dep tanydy. Oǵan 1 500 AEK, ıaǵnı 3,7 mln teńge kóleminde qylmystyq aıyppul salyndy.
Jalpy somasy 198,8 mln teńgeni quraıtyn kontrabandalyq taýar memleket paıdasyna tárkilendi.
