Kólik polıtsııasynyń jas qyzmetkerleri men olardyń tálimgerleri Astanada bas qosty
ASTANA. QazAqparat - Búgin Astanada QR ІІM Kóliktegi ІІD-de jas polıtsııa qyzmetkerleri men olardyń tálimgerleriniń sleti bolyp ótti.
Bul týraly Kóliktegi ІІD baspasóz qyzmeti habarlady.
Sharanyń maqsaty - tártip saqshylaryn kásibı sheberlikke baýlý, mamandyqtyń bedelin kóterý, olardy ishki ister organdarynyń ozyq dástúrleri baǵytynda tárbıeleý. Qazaqstan polıtsııasynyń 25 jyldyǵyna arnalǵan sletke QR ІІM Qadr jumysy departamenti bastyǵynyń orynbasary polıtsııa polkovnıgi R.Q. Qurymbaev, ІІO ardagerleri jáne barlyq jelilik bólinisterden kelgen 110 jas maman men olardyń tálimgerleri qatysty.
Eń aldymen jas qyzmetkerler departament tarıhynan syr shertetin murajaıdy tamashalady. Budan soń májilis zalynda slettiń saltanatty ashylýy boldy.
Aıtýly sharany quttyqtaý sózimen ashqan Departament bastyǵynyń orynbasary polıtsııa polkovnıgi Renat Ýnarbekov El Prezıdenti N.Á. Nazarbaevtyń elimizdiń ishki ister organdary qyzmetkerlerine el qaýipsizdigin qoǵaý, azamattardyń erkindigi men tynyshtyǵyn saqtaý baǵytynda zor jaýapkershilik júktep otyrǵandyǵyn atap ótti. Sondaı-aq, ol árbir tálimger men aǵa býyn ókilin jas qyzmetkerlerge Qazaqstan Respýblıkasy zańdaryn shynaıy dáripteýdi úıretýge shaqyrdy.
Jas qyzmetkerler aldynda ІІO ardagerleri kásibı sheberlikterimen bólisti. Olar ózderiniń jas áriptesterine myqty densaýlyq, baqyt pen aldaǵy jaýapty qyzmetterine tabystar tilep, aq tilekterin joldady.
Jıyn barysynda jas qyzmetkerler de sóz sóılep, ózderi tańdaǵan mamandyqtary týraly pikirlerimen bólisti. Astana qalasy áýejaıyndaǵy Іshki ister jelilik bóliminiń qyzmetkeri polıtsııa leıtenanty Temirlan Hamzın sletke qatysýshy jas maman qyzmetkerler atynan ózderine berilgen sapaly bilim men artylǵan senim úshin Departament basshylyǵy men tálimgerler qaýymyna júrekjardy alǵysyn aıtyp, aldaǵy ýaqytta qyzmette joǵary kórsetkishterge qol jetkizetindikterin, sol jolda aıanbaı eńbek etetinderin, sóıtip, óz isiniń naǵyz kásibı sheberleri bolatyndyqtaryna ýáde berdi.
Jıyn barysynda úzdik tálimgerlerge gramotalar men alǵys hattar tabys etildi.
Jıynnyń saltanatty bóliminen soń sletke qatysýshylar óziniń qyzmettik boryshyn óteý barysynda erlikpen qaza tapqan qyzmetkerlerge arnalǵan eskertkish memorıalyna gúl shoqtaryn qoıyp, olardyń rýhtaryna taǵzym etti.
Slet aıasynda qatysýshylarǵa «Juldyzdar toǵysqanda» kınofılmi kórsetildi. Buǵan qosa olar QR Tuńǵysh Prezıdenti murajaıyn tamashalap, elimizdiń bas qalasy-Astananyń kórnekti jerlerine saıahat jasady.
