Kólik polıtsııasynyń basshysy halyq aldynda esep berdi
ASTANA. QazAqparat -Astana qalasynda QR ІІM Kóliktegi ІІD bastyǵy polıtsııa polkovnıgi Amanjol Qabylov departament halyq aldynda esep berdi, dep habarlaıdy departamenttiń baspasóz qyzmeti.
Departament bastyǵy Amanjol Qabylov jınalǵandarǵa Kóliktegi ІІD-niń 2017 jylǵy birinshi jartyjyldyqtaǵy jedel-qyzmettik jumysynyń qorytyndylary týraly aqparat berdi. Amanjol Jaıǵalıulynyń sózinshe, jyl basynan beri Departamenttiń qyzmet kórsetý aýmaǵynda barlyǵy 1437 qylmystyq quqyq buzýshylyq tirkelgen. Qylmystardyń jalpy ashylýy - 71 %-dy qurady.
Esepti merzim ishinde qylmystar sanyn 6,4 %-ǵa azaıtýǵa, onyń ishinde aýyr qylmystardy 32 %-ǵa, onsha aýyr emes qylmystardy 23,4 %-ǵa tómendetýge qol jetkizildi.
Baıandamada ókiletti memlekettik organdardyń ózara yqpaldastyǵy boıynsha máseleler, sondaı-aq, qoǵamda tártipsizdikter men usaq quqyq buzýshylyqtarǵa «múldem tózbeýshilik» qaǵıdatyn qalyptastyrý boıynsha qabyldanǵan sharalardyń tıimdiligi sóz boldy.
Budan soń kezdesýge arnaı kelgen azamattar Departamen bastyǵyna ózderin tolǵandyrǵan san-alýan suraqtaryn qoıdy. Olardyń kópshiligi jolaýshylar poıyzdaryndaǵy qaýipsizdik máselelerine, temir jol vokzaldary perrondarynda zańsyz saýdamen aınalysý, zańsyz taksı qyzmetine qatysty qoıyldy. Al, joǵary oqý oryndaryn bitirgen jastar ishki ister organdaryna qyzmetke kirý úshin úmitkerlerge qoıylatyn talaptar týraly bilgileri keletindikterin jetkizdi.
Sonymen qatar azamattardan Departament bastyǵynyń blogyna, áleýmettik jeliler arqyly jazbasha túrde suraqtar kelip tústi. Jeke ótinishter boıynsha Kóliktegi ІІD apparaty qyzmetteri men bólinisteriniń basshylaryna naqty nusqaýlar berildi.
Kezdesý barysynda Konsýltatıvti-keńesshi organnyń jumysyna birqatar usynystar engizildi jáne kólik polıtsııasy jumysyn odan ári jetildirý boıynsha nusqaýlar berildi.
«100 naqty qadam» Ult josparynda el Prezıdenti N.Á. Nazarbaev polıtsııa qyzmetiniń tıimdiligin arttyrý mindetin qoıdy. Rasynda, búginde qoǵammen ózara baılanysty nyǵaıtý, sol arqyly halyqtyń polıtsııaǵa degen senimin arttyrý asa mańyzdy. Bul azamattarǵa óz qaýipsizdikterin qamtamasyz etýge úles qosýǵa múmkindik beredi», - dedi KKO tóraǵasy Esbol Sháımerdenov.
Shara sońynda elimizdiń Bas kólik polıtseıi barsha jınalǵan qaýymǵa belsendi qatysqandary úshin alǵysyn bildirip, kelip túsken ótinishter men usynystardyń eshqaısysynyń qaraýsyz qalmaıtyndyǵyn aıtty.
