Kólik polıtsııasy Tuńǵysh Prezıdent kúnine oraı úzdik tergeýshiler men jedel ýákilderdi marapattady

NUR-SULTAN. QazAqparat - Búgin, 29 qarasha kúni ІІM Kóliktegi polıtsııa departamentinde Qazaqstan Respýblıkasynyń Tuńǵysh Prezıdenti kúnine arnalǵan saltanatty shara ótti. Oǵan departament basshylyǵy men jeke quramy jáne ishki ister organdarynyń ardagerleri qatysty, dep habarlaıdy QazAqparat atalmysh departamenttiń baspasóz qyzmetine silteme jasap.

Merekelik shara Departament bastyǵy Ońal Bekeevtiń quttyqtaý sózimen ashyldy. Ol Qazaqstan Respýblıkasynyń búgingideı táýelsiz memleket bolyp qalyptasýynda Tuńǵysh Prezıdent – Elbasy Nursultan Ábishuly Nazarbaevtyń sińirgen eńbeginiń orasan ekendigin aıtty.

«Elimiz 1 jeltoqsanda - jalpyulttyq mereke - Tuńǵysh Prezıdent kúnin atap ótpek. Bul qazaqstandyqtar men ult Kóshbasshysynyń birligin aıǵaqtaıtyn, ári Elbasy N. Nazarbaevtyń syndarly saıasatyn júzege asyrýda qoǵamnyń turaqtylyǵy men shoǵyrlanýyn nyǵaıtýǵa zor yqpal etetin mereke», - dedi bas kólik polıtseıi.

«Elbasy táýelsiz Qazaqstannyń berik irgetasyn qalady. Búgingi kúni qoǵamdyq tártip, azamattarymyzdyń tynyshtyǵy men olardyń erteńge degen senimi polıtseılerdiń qyzmetteriniń nátıjesine tikeleı baılanysty. Bul rette, departamenttiń jeke quramy memleketimizdiń kemel keleshegi men azamattarymyzdyń, áýe jáne temir jol kóligi jolaýshylarynyń qonstıtýtsııalyq quqyqtaryn qorǵaý jolynda aıanbaı eńbek etetindikterine senemin», - dep túıindedi sózin polıtsııa polkovnıgi.

Tuńǵysh Prezıdent kúni merekesine oraı quqyqtyq tártip pen qaýipsizdikti nyǵaıtý isinde ózderiniń qyzmettik mindetterin abyroımen atqarǵandary úshin 40-qa jýyq kólik polıtseıi men ishki ister organdarynyń ardagerleri medaldarmen, QR ІІM mınıstriniń jáne Departament bastyǵynyń gramotalarymen marapattaldy.

Olardyń qatarynda úzdik tergeýshiler, jedel ýákilder, krımınalıster men anyqtaýshylar bar.

Máselen, Ózindik qaýipsizdik basqarmasynyń bastyǵy S. Omarǵazınge «polıtsııa polkovnıgi» ataǵy merziminen buryn berildi. Ol qyzmetin 1995 jyly Semeı stantsııasyndaǵy jelilik ishki ister bóliminiń mılıtsıoneri bolyp bastaǵan.

Sondaı-aq polıtsııa maıory R. Qabyshev quqyqtyq tártipti nyǵaıtýǵa qosqan zor úlesi úshin «Іshki ister organdarynyń úzdigi» ІІ-dárejeli medalin keýdesine taqty. Іshki ister organdarynda 15 jylǵa jýyq eńbek etken ol búgin kúni Nur-Sultan stantsııasyndaǵy jelilik polıtsııa bólimi kóshi-qon qyzmeti bólimshesiniń bastyǵy.

Shara sońynda Departamenttiń jeke quramy «Elbasy joly» kınoepopeıasy «Ot-ózen» kórkem fılmin tamashalady.