Kólik polıtseılerin temir jol boıynda jasóspirimderdiń jıi jaraqat alýy alańdatyp otyr
Keńeske Qazaqstan Respýblıkasy Parlamenti Májilisiniń depýtaty Qoǵamdyq keńestiń tóraǵasy Serik Ospanov, QR Kóliktegi ishki ister departamentiniń bastyǵy polıtsııa polkovnıgi A. Qajkenov, Qoǵamdyq keńes pen Ardagerler keńesiniń músheleri, sondaı-aq qyzmet basshylary qatysty.
Jıyndy ashqan Kóliktegi ishki ister departamentiniń bastyǵy polıtsııa polkovnıgi Ahan Qajkenov óz sózinde kólik polıtseıleri Elbasynyń strategııalyq tapsyrmalaryn oryndaýda qarqyndy jumys jasap jatqandyǵyn aıtty. «EKSPO-2017 kórmesi qarsańynda elordanyń qoǵamdyq tártibi men qylmys jıi jasalatyn oryndardy baqylaýǵa alý kólik polıtseıleriniń aldynda turǵan úlken jaýapkershilik. Kórmeni ótkizý barysynda bizdiń qyzmetkerler áýejaılar men temir jol nysandarynda kúsheıtilgen tártipte jumys jasaıdy. Sol sebepti EKSPO-2017 kórmesin uıymdastyrý maqsatynda aýqymdy sharalar búginnen bastalyp ketti», - dedi elimizdiń bas kólik polıtseıi.
Basqosýda «Kólik nysandaryndaǵy quqyqbuzýshylyqtardyń aldyn alý týraly jáne azamattardyń qaýipsizdigin qamtamasyz etý máseleleri» taqyrybynda Ákimshilik polıtsııa basqarmasynyń bastyǵy Nurlan Sadyqov baıandama jasady. Máselen, 2014 jyldyń 10 aıynda poıyzdardyń adamdardy qaǵyp ketý oqıǵalary boıynsha 121 fakti tirkelgen, onyń 72-si qaıǵyly oqıǵamen aıaqtalǵan. Mundaı oqıǵalar kóp jaǵdaıda azamattardyń eskertýlerge nemquraılylyq tanytyp, júretin joldaryn qysqartý nıetterinen oryn alady.
Ásirese, kólik polıtseılerin temir jol boıynda jasóspirimderdiń jıi jaraqat alýy alańdatyp otyr. 2014 jyldyń basynan beri kámelettik jasqa tolmaǵan balalarǵa qatysty 10 fakti tirkelgen, onyń 4-i qaıǵyly jaǵdaıǵa ákep soqtyrǵan.
Joǵarydaǵy keleńsizdikterdiń oryn alýynyń basty sebepteri - azamattardyń belgilenbegen jerlerden joldy kesip ótýi men qaýipsizdik erejelerin saqtamaýy, sondaı-aq, jasóspirimderdiń qarapaıym qaǵıdalardy bilmeýi nemese temir jol boıynyń qaýipti aımaq ekendigin eskermeýi.
Sondyqtan temir jol boıynda oryn alatyn oqıǵalar týraly aqparattardyń shynaıylyǵyna kóz jetkizip, kináli tarapqa tıisti jaza taǵaıyndaý úshin kúzetiletin nemese kúzetilmeıtin jerlerdiń barlyǵyna beıne jazyp alǵysh quraldary ornatý kerektigi aıtyldy.
Jıynda qaralǵan ekinshi másele - ishki ister organdaryndaǵy zańdylyq pen kólik polıtseıleriniń arasyndaǵy tártip. «Biz de búginde sybaılas jemqorlyqpen qarqyndy kúresýdemiz. Aǵymdaǵy jyldyń basynan beri Departamenttiń Ózindik qaýipsizdik basqarmasynyń qyzmetkerleri atalǵan zań talaptaryn buzǵan 6 faktini anyqtady. Kináliler ishki ister organy qatarynan shyǵaryldy. Bul jumys ári qaraı jalǵasyn tabady», - dedi Ózindik qaýipsizdik basqarmasynyń bastyǵy polıtsııa maıory M. Aıtýǵanov.
Qoǵamdyq keńeske qatysqan Májilis depýtaty Serik Ospanov Kóliktegi ІІD qyzmetkerleriniń jumysyna óz kózqarasyn bildirdi. Ol qyzmet kórsetý aýmaǵynda qaýipsizdik sharalaryn jaqsartý baǵytynda birqatar usynystar aıtty. Onyń bul usynystaryn Departament bastyǵy A. Qajkenov te qoldady.
Jıyn sońynda Serik Ospanov qatysýshylardy Qoǵamdyq keńestiń 2015 jyldyń 1-jartyjyldyǵyna arnalǵan jumys josparymen tanystyrdy.
Qoǵamdyq keńestiń qorytyndysy boıynsha birqatar sheshimder qabyldandy, dep habarlaıdy Kóliktegi ІІD baspasóz qyzmeti.
