Kólik polıtseıleri jyl basynan beri 900-ge jýyq sheteldikti jaýapqa tartty
NUR-SULTAN. QazAqparat - Kólik polıtseıleri aǵymdaǵy jyldyń basynan beri 900-ge jýyq shetel azamatyn ákimshilik jaýapqa tartty. Bul týraly QR ІІM-niń Kóliktegi polıtsııa departamentiniń baspasóz qyzmeti habarlady.
Baspasóz qyzmeti taratqan málimetterge qaraǵanda, Kóshi-qon qyzmeti basqarmasynyń málimetine sáıkes, Kóliktegi polıtsııa departamentiniń qyzmet kórsetý aýmaǵynda aǵymdaǵy jyldyń basynan beri júrgizilgen is-sharalardyń nátıjesinde kólik polıtseıleri 897 azamatty ákimshilik jaýapqa tartty. Onyń 794-i TMD azamaty, al 15-i ózge shet memleketterden.
Máselen, Shý stantsııasyndaǵy jelilik polıtsııa bóliminiń qyzmetkerleri Qazaqstan Respýblıkasy zańnamasyn buzǵany úshin 22 jastaǵy Aýǵanstan azamaty ákimshilik jaýapqa tartyldy.
Oǵan qatysty QR ÁQBtK-niń 517-babynyń 2- bóligi, ıaǵnı sheteldikpen nemese azamattyǵy joq tulǵamen halyqtyń kóship-qonýy salasyndaǵy Qazaqstan Respýblıkasynyń zańnamasyn buzý boıynsha ákimshilik hattama toltyryldy. Joǵaryda atalǵan azamat Shý aýdandyq sotynyń qaýlysymen el aýmaǵynan shyǵaryldy.
Sondaı-aq, Qazaqstan Respýblıkasy zańnamasyn buzǵany úshin 4 qylmystyq quqyqbuzýshylyq anyqtalǵan. Onyń ishinde zańsyz kóshi-qondy uıymdastyrǵany úshin - 1, el aýmaǵynan tysqary shyǵarý týraly sottyń sheshimin oryndamaǵany úshin - 2 jáne memlekettik shekarany qasaqana ótkeni úshin - 1 zańbuzýshylyq anyqtaldy. Buǵan qosa kólik polıtseıleri jeke basyn kýálandyratyn qujattary joq 14 shetel azamatyn qabyldaý ornyna ornalastyrdy.
81 shetel azamaty sot qaýlysymen el aýmaǵynan shyǵaryldy.
