Kólik polıtseıleri jyl basynan beri 7 tonna 700 keli esirtki zattaryn tárkilegen
ASTANA. QazAqparat - Kóliktegi ishki ister departamenti qyzmetkerleri esirtki jáne esirtki qylmysynyń aldyn alý maqsatynda keshendi is-sharalardy únemi júzege asyrady.
Jyl basynan beri Kóliktegi ishki ister departamenti Esirtki bıznesine qarsy kúres basqarmasy qyzmetkerleri esirtki qylmysyna qatysty 225 faktini tirkedi. Onyń 96-y esirtki zattaryn zańsyz ótkizý, 19-y kontrabandalyq jolmen tasymaldaý faktileri. Zańsyz aınalymǵa túsken 7 tonna 700 keli ártúrli esirtki zattary tárkilendi, onyń 14 kelisi geroın. Bul týraly Kóliktegi ІІD baspasóz qyzmetinen habarlady.
Basqarma qyzmetkerleri esirtki tasymaldaýshylar men uıymdasqan qylmystyq toptardyń jolyn kesý maqsatynda «Kóknár», «Dopıng», «Rýbej», «Kanal» jedel aldyn-alý sharalaryn udaıy ótkizýde.
Mysaly, sáýir aıynda Kóliktegi ІІD Esirtki bıznesine qarsy kúres basqarmasy qyzmetkerleriniń jedel izdestirý sharalary barysynda Astana qalasynyń mańynda 48 jastaǵy Qaraqalpaqstannyń azamaty iri kólemdegi esirki partııasymen aınalysqany anyqtaldy. Tekserý kezinde, ustalǵan azamattyń turǵylyqty meken-jaıynan 10 keli 30 gr. «geroın», 197,76 gr. «gashısh», 70,12 gr «marıhýana» tabylyp, tárkilendi.
Sondaı-aq, 24 qyrkúıekte Kóliktegi ІІD-niń esirtki bıznesine qarsy kúres basqarmasy qyzmetkerlerniń jedel izdestirý sharalary barysynda Astana qalasy men Aqmola oblysynda óte iri kólemde esirtki zatyn tasymaldaýmen aınalysqan qylmystyq top ustaldy. Tergeý nátıjesinde ustalǵan qylmyskerdiń turaǵynan 500 gramm geroın tabylǵan.
Esirtki bıznesine qarsy kúres basqarmasy shekara qyzmetindegi ishki ister organ qyzmetkerlerimen ózara qarym-qatynas ornatý máselesine kóp kóńil bólip keledi. Olarmen birlesip ótkizgen sharalar oń nátıje berýde. Máselen, 6 qyrkúıektegi birlesken shara barysynda «Dýshanbe-Máskeý» baǵytyndaǵy poıyzdyń akkýmlıatorynyń astynynan 2 keli 459 gramm geroın tabylǵan.
