Kólik polıtseıleri jyl basynan beri 20 myńnan astam adamdy ákimshilik jaýapqa tartty
NUR-SULTAN.QazAqparat - Kólik polıtseıleri temir jolda belgilenbegen jerlerden ótkeni úshin 20 myńnan astam adamdy ákimshilik jaýapqa tartty, dep habarlaıdy QazAqparat.
Bul týraly Kóliktegi polıtsııa departamentiniń baspasóz qyzmeti málim etti.
«Kólik polıtseıleri aǵymdaǵy jyldyń basynan beri temir jol boıynda adamdar men úı janýarlarynyń bolýyna baılanysty poıyzdardyń shuǵyl tejeýiniń aldyn alý maqsatynda halyqpen 572 kezdesý jáne 968 keshendi reıdtik is-sharalar ótkizdi», - dedi QR ІІM Kóliktegi polıtsııa departamentiniń Ákimshilik polıtsııa basqarmasynyń bastyǵy Jasulan Baıkenov.
J. Baıkenovtyń aıtýynsha, aǵymdaǵy jyl basynan beri temir jol tóseminiń belgilenbegen jerlerinen ótkeni úshin 20 072 azamat ákimshilik jaýapqa tartylǵan.
Osy ýaqyt ishinde poezdarda 1723 shuǵyl tejeý faktisi tirkeldi, onyń ishinde 479-y adamdardyń, 1172-si maldyń bolýyna baılanysty. Sondaı-aq, temir joldarǵa bógde zattardy qoıý boıynsha 572 fakti tirkelgen.
Máselen, Qyzylorda stantsııasynyń Jelilik polıtsııa bólimine «Qyzylorda–Nur-Sultan» baǵytyndaǵy jolaýshylar poıyzynyń teplovoz mashınısi adam soǵýdyń aldyn alý maqsatynda jedel tejeýdi qoldanǵany týraly habarlama kelip tústi.
Tekserý barysynda Jambyl oblysynyń 38 jastaǵy turǵyny anyqtalyp, ustaldy. Ol júrip bara jatqan poezdyń aldyna shyǵyp, ony toqtatpaq bolǵan.
Medıtsınalyq kýálandyrý nátıjesi quqyqbuzýshynyń orta dárejeli mas kúıde bolǵandyǵyn rastady.
Ustalǵan azamatqa qatysty QR ÁQBtK-niń 559-baby 5-tarmaǵy, ıaǵnı, belgilenbegen jerlerde temir jol arqyly ótý jáne 440 baptyń 1-tarmaǵy, ıaǵnı, qoǵamdyq oryndarǵa masań kúıde kelý boıynsha eki ákimshilik hattama toltyryldy. Nátıjesinde oǵan 5 AEK ( 12 625 tenge) kóleminde aıyppul salyndy.
Joǵaryda kórsetilgen poezdyń toqtaý ýaqyty 2 mınýtqa sozyldy.
«Kólik polıtseıleri temir jol kóligi nysandarynda qaýipsizdik erejelerin saqtaý jáne temir joldan tek arnaıy belgilengen jerlerden ǵana ótý qajettigin taǵy da eske salady. Ásirese, ata-analar men balalar temir jol - asa qaýipti aımaq ekendigin esten shyǵarmaýlary tıis», dedi Jasulan Baıkenov.
