Kólik polıtseıleri Jeńis kúni men Otan qorǵaýshylar kúnin atap ótti

ASTANA. QazAqparat - Kóliktegi polıtsııa departamentinde Jeńis meıramy men Otan qorǵaýshylar kúnine arnalǵan merekelik is-shara ótti. Ol qyzmettik boryshyn óteý kezinde erlikpen qaza tapqan qyzmetkerlerge arnalǵan «Máńgi umytylmas esimder» eskertkishine gúl shoqtaryn qoıýdan bastaldy, dep habarlaıdy Kóliktegi polıtsııa departamentiniń baspasóz qyzmeti.

Departament basshylyǵy men jeke quramy, sondaı-aq ІІO-nyń ardagerleri surapyl soǵysta qaza tapqan jaýyngerlerdi bir sát únsizdikpen eske aldy.

Saltanatty is-sharany ashqan Kóliktegi PD bastyǵy Baqytjan Malybaev: «Biz surapyl soǵysta Otan úshin otqa túsken batyrlarymyzdyń óshpes rýhy aldynda, árdaıym, taǵzym etemiz. Búgingideı beıbit zamanǵa aǵa býynnyń jankeshti erligi men ór mineziniń arqasynda qol jetkizdik. Endigi jerde el egemendigin saqtap qalý - bizdiń ortaq boryshymyz», - dedi. Vedomstvo basshysy merekelik sharaǵa qatysýshylardy Otan qorǵaýshylar kúnimen de quttyqtady.

«Táýelsiz Qazaqstannyń Qarýly kúshteri el tynyshtyǵyn abyroımen kúzetip, Otan qorǵaýshylarymyz partıotızmniń jarqyn úlgisin kórsetip keledi. Aıbyndy armııamyzdyń dańqy arta bersin!

Elimizdiń eńsesi bıik, bolashaǵy jarqyn bolsyn. Ulyq merekede barshańyzǵa zor densaýlyq, ashyq aspan, otbasylyq baqyt tileımin», - dedi polıtsııa polkovnıgi.

Budan soń Kóliktegi PD ardagerler keńesiniń tóraǵasy Esbolat Shaımerdenov sóz sóıledi. Onyń aıtýynsha, bıyl Departamentte Jeńistiń 78 jyldyǵyn 1 soǵys ardageri, 10 tyl eńbekkeri jáne UOS ardagerleriniń 8 jesiri atap ótýde. Olardyń eshqaısysy nazardan tys qalǵan joq. Barlyǵyna materıaldyq kómek kórsetildi.

Máselen, 96 jastaǵy UOS-nyń ardageri Ivan Makeev Taraz qalasynda turady. Ivan Fedorovıch 1944 jyly keńes áskeriniń qataryna shaqyrylǵan. 1951 jylǵa deıin japon ımperıalısterine qarsy shaıqasqa, Harbın men Mýkden qalalaryn azat etýge qatysty. Ol «1941-1945 jj. Otan soǵysy» ІІ-dárejeli ordeni men 20-dan astam medaldardyń ıegeri.

1953 jyly KSRO ІІM Mogılev arnaıy kólik mılıtsııasy mektebine oqýǵa túsip, ony aıaqtaǵan 1955 jyly Jambyl stantsııasyndaǵy jelilik polıtsııa bólimine qyzmetke kelgen.

1982 jyly I. Makeev eńbek demalysyna shyqsa da, Departamenttiń ardagerler uıymynyń jumysyna belsene qatysty. Búgin de Ivan Fedorovıch balalary, nemereleri men shóbereleri úshin eń qymbat adam, al áriptesteri úshin ol árqashan batyr ári úlgi tutar bıik tulǵa bolyp qala bermek.

Merekelik is-sharada 20 jas polıtsııa qyzmetkeri Otanǵa adal qyzmet etýge ant qabyldady. Al, qyzmettik mindetterin adal atqarǵany úshin 100-ge jýyq kólik saqshysy QR ІІM jáne KPD medaldarymen jáne gramotalarymen marapattaldy.