Kólik polıtseıleri jańa jyl merekesinde kúsheıtilgen qyzmetke kóshti
NUR-SULTAN. QazAqparat - Tıisti qoǵamdyq tártipti saqtaý, áýe jáne temirjol kóligi nysandarynda qylmystar men quqyq buzýshylyqtardyń aldyn alý jáne jolyn kesý maqsatynda QR ІІM Kóliktegi polıtsııa departamentiniń jeke quramy qyzmet kórsetýdiń kúsheıtilgen nysanyna kóshirildi.
Bul týraly QR ІІM Kóliktegi polıtsııa departamentiniń baspasóz qyzmeti habarlaıdy.
Ákimshilik polıtsııa basqarmasynyń bastyǵy Jasulan Baıkenovtiń sózinshe, kólik polıtseıleriniń basty mindetteriniń biri qoǵamdyq tártip pen azamattardyń qaýipsizdigin qamtamasyz etý boıynsha sharalar qabyldaý.
«Shynynda da, mereke kúnderi jolaýshylar aǵyny eselep artady. Óz kezegimizde, biz azamattarǵa qaýipsiz ári jaıly jaǵdaı jasaý úshin barlyq sharalarmen qamtamasyz etetin bolamyz», - deıdi polıtsııa podpolkovnıgi.
J. Baıkenovtyń aıtýynsha, Jańa jyl merekesi kezinde adamdar kóp shoǵyrlanatyn nysandarda, atap aıtqanda jolaýshylar poezdarynda, vokzaldar men perrondarda quqyqbuzýshylyq jasaýǵa beıim tulǵalardy anyqtaý jáne jolyn kesý boıynsha jedel-aldyn alý is-sharalary júrgiziledi.
Sondaı-aq azamattardyń qylmystar men olarǵa qatysty oqıǵalar týraly ótinishterine jedel den qoıý úshin departamenttiń kezekshi bólimderi men onyń jelilik bólinisteriniń janynan qosymsha jedel-tergeý toptary quryldy. Budan basqa, bizdiń qyzmetkerler kelý jáne ketý ýaqytynda, olardyń júrý jolynda halyqaralyq, respýblıkalyq mańyzdaǵy jolaýshylar poezdaryna ilesip júredi. Elimizdiń barlyq áýejaılary men temirjol vokzaldarynda kınologııalyq qyzmet ortalyǵynyń mamandary qyzmettik-izdestirý ıtterimen patrýldeýge shyǵady.
Kólik saqshylary jańa jyl merekesinde kezekti ret azamattardyń jeke múlikterin saqtap qalý, saq bolý jáne júkti shamaly ýaqytqa bolsyn qaraýsyz qaldyrmaý kerektigin eskertedi. Eger Sizge qatysty quqyqbuzýshylyq jasalǵan bolsa, bul faktiler týraly dereý Kóliktegi polıtsııa departamentiniń kezekshi bólimine 943262 telefony boıynsha nemese «102» telefonyna habarlaý kerek.
Eske saqtańyz, jasalǵan quqyqbuzýshylyq týraly polıtseılerge birden habarlassańyz, oryn alǵan qylmystyń «izin sýytpaı ashýǵa» múmkindik artady.
Eske sala keteıik, Departamenttiń qyzmet kórsetý aýmaǵynyń jalpy kólemi 17 myń km. asady. Osy aýmaqta 300-den asa temirjol vokzaly jáne 18 áýejaı kiredi, olardyń 16-sy halyqaralyq mańyzǵa ıe.
