Kólik polıtseıleri zańsyz aınalymnan 8 tonnaǵa jýyq esirtki zattaryn tárkiledi
ASTANA. 6 qarasha. QazAqparat - 2013 jyldyń 1 maýsymy men 30 qazany aralyǵynda QR ІІM Kóliktegi ІІD-niń qyzmet kórsetý aýmaǵynda «Kóknár-2013» jedel aldyn-alý sharasy ótti. Oǵan departamenttiń jelilik bólimsheleriniń barlyq kúshteri jumyldyryldy.
«Kóknár-2013» jedel aldyn-alý sharasyn ótkizý barysynda departamenttiń qyzmet kórsetý aýmaǵynda jolaýshylar poıyzdary men áýe kóligi nysandaryn tekserý úshin departamenttiń esirtki bıznesine qarsy kúres, krımınaldyq polıtsııa, uıymdasqan qylmysqa qarsy kúres, ákimshilik polıtsııasy men kınologııalyq ortalyq qyzmetterinen arnaıy mobıldik toptar quryldy. Sondaı-aq, áýejaılar men temirjol vokzaldarynda zańsyz esirtki tasymalymen aınalysatyn tulǵalardy anyqtaý úshin keshendi sharalar júzege asyryldy.
Іs-shara barysynda zańsyz esirtki aınalymyna qatysty 83 qylmys anyqtaldy, onyń ishinde 32-si ótkizý faktisi. Sonymen qatar, 5 esirtki kontrabandasynyń joly kesildi.
Esirtki qylmysyn jasaǵany úshin 63 adam ustalyp, 152 tulǵa ákimshilik jaýapkershilikke tartyldy.
Atalmysh shara sheńberinde, zańsyz aınalymnan 6 tonna 650 keliden asa túrli esirtki zattary tárkilendi.
Aıta ketý kerek, jyl basynan beri, esirtki qylmysyna qatysty 214 qylmystyq is qozǵaldy. Onyń ishinde, 91-i esirtki ótkizý faktisi jáne 16-sy esirtki kontrabandalyq jolmen tasymaldaý faktisi. Bul týraly Kóliktegi ІІD baspasóz qyzmetinen habarlady.
