Kólik polıtseıleri uıaly telefon tonaǵan eki jas jigitti ustady
ASTANA. QazAqparat - 11 qarasha kúni Almaty-1 stansasyndaǵy Іshki ister jelilik basqarmasyna 18 jastaǵy azamat habarlasyp, osy jyldyń 28 qazan kúni Almaty-2 stansasynda tórt belgisiz azamat ózine qatysty kúsh qoldanyp, 2 uıaly telefony men 25 000 teńge aqshasyn tartyp alǵanyn aıtqan.
Bul týraly Kóliktegi ІІD baspasóz qyzmeti habarlady.
Kóliktegi ІІD krımınaldyq polıtsııa qyzmetkerleriniń Almaty-1 ІІJB krımınaldyq polıtsııa bóliminiń qyzmetkerlerimen birlesip atqarǵan sharalarynyń nátıjesinde 1992 jáne 1998 jyldary týylǵan eki azamat kúdikti retinde anyqtalyp, ustaldy. Olardyń ekeýi de Jambyl oblysynyń turǵyndary bolyp shyqty. Kúdiktilerdiń biri kámelet jasyna tolmaǵan jasóspirim.
Atalǵan fakti QR QK 191 babynyń 2 bólimi boıynsha (tonaý) sotqa deıingi tergeýdiń biryńǵaı reestrine tirkeldi.
Qazir 1992 jyly týylǵan jigitke tutqyndaý sharasy qoldanylsa, kámeletke tolmaǵan onyń sybaılasy kámeletke tolmaǵandardy beıimdeý ortalyǵyna ornalastyryldy. Buzaqylardyń qalǵan ekeýi izdestirilýde.
Tergeý amaldary júrgizilýde.
«Eske sala keteıik, adamdar tobynyń aldyn ala sóz baılasýymen jasalǵan tonaý - múlki tárkilenip, úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», - dep eskertilgen habarlamada.
