Kólik polıtseıleri Úshtóbede jalǵan aqparat taratqan áıeldi anyqtady
NUR-SULTAN. QazAqparat – Polıtsııa Úshtóbede koronovırýsqa qatysty jalǵan aqparat taratqan áıeldi anyqtady, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.
Kólik polıtsııasyna Úshtóbe stansasynda koronovırýsqa kúdikti eki azamatty poıyzdan túsirip alǵany týraly jalǵan aqparat taratylǵany jóninde habarlama 28 naýryzda saǵat 21.15-te kelip túsken. Ony Taldyqorǵan kólik prokýratýrasynyń kezekshi prokýrory áleýmettik jelige monıtorıng júrgizý barysynda anyqtaǵan.
Jelide taralǵan aýdıo jazbada belgisiz áıel Úshtóbe stansasynda eki azamatty koronovırýs juqtyrýy múmkin degen kúdikpen poıyzdan túsirip alǵany týraly aıtqan.
Bul habarlama Úshtóbe stansasyndaǵy jelilik polıtsııa bóliminiń Sotqa deıingi tergep tekserýdiń biryńǵaı tizilimine QR QK 274-babynyń 4-bóligi 2-tarmaǵy boıynsha tirkeldi (Kórineý jalǵan aqparat taratý).
30 naýryzda Úshtóbe stansasy Jelili polıtsııa bólimshesi qyzmetkerleri 48 jastaǵy Úshtóbe qalasynyń turǵynyn anyqtady. Tekserý barysynda áıeldiń qaladaǵy orta mektepte muǵalim bolyp jumys isteıtindigi belgili boldy.
Suraý alý kezinde ol óz kinásin moıyndap, «Whatsapp» messenddjerinde jalǵan aqparat taratqanyn rastady.
