Kólik polıtseıleri taǵy da joǵalǵan iri kólemdegi aqshany ıesine qaıtardy
NUR-SULTAN. QazAqparat - Kólik polıtseıleri jolaýshylardyń jalpy somasy 6 mln teńgeden asatyn, abaısyzda joǵaltqan aqshalaryn taýyp, ıesine qaıtardy, dep habarlaıdy QazAqparat.
Bıylǵy jyldyń 7 jeltoqsanynda Q.Nuraly esimdi azamat «Almaty–Nur-Sultan» baǵytymen ushý úshin Almaty qalasynyń áýejaıynda tekserýden ótken bolatyn. Onyń syrt kıiminiń ishki qaltasynda 740 000 teńge jáne 1 600 AQSh dollar somasynda aqsha qarajaty bolǵan.
Q.Nuraly aqshasynyń joǵalǵandyǵyn áýe kemesiniń bortynda otyrǵanda biraq bilgen. Elorda áýejaıyna ushyp kelgen soń, ol birden Nur-sultan qalasy áýejaıyndaǵy Jelilik polıtsııa bólimine iri kólemdegi aqshasynyń joǵalǵany týraly ótinish bildirdi. JPb qyzmetkerleri bul týraly dereý Almaty qalasyndaǵy áriptesterine habarlady.
Almaty qalasy áýejaıyndaǵy kólik polıtseıleri jedel-izdestirý is-sharasyn júrgizip, nátıjesinde ushý aldyndaǵy tekserý pýnktiniń janynan joǵalǵan aqshany taýyp aldy. Aqsha zańdy ıesine qaıtaryldy.
Óz kezeginde elorda turǵyny Q.Nuraly joǵalǵan aqshasyn ózine qaıtarǵan polıtseılerge alǵysyn bildirdi.
Kóliktegi Polıtsııa departamentiniń basshylyǵy qyzmettik mindetterin úzdik atqarǵan polıtseılerdi marapattaýdy josparlap otyr.
Esterińizge sala keteıik, aǵymdaǵy jyldyń 27 qarashasy men 2 jeltoqsanynda kólik polıtseıleri Reseı Federatsııasynyń azamaty M.Sýhomlınovqa jáne Jýlanovtar otbasyna joǵalǵan qujattaryn jáne 5 mln teńgeden astam aqsha qarajattaryn taýyp, qaıtaryp bergen bolatyn.
