Kólik polıtseıleri poıyzda ketip bara jatqan júkti áıeldiń bosanýyna kómektesti
ShÝ. QazAqparat - Shý stansasyndaǵy jelilik polıtsııa bólimine «Kókshetaý-Qyzylorda» baǵytyndaǵy jolaýshylar poıyzynyń jolaýshysy medıtsınalyq kómekke muqtaj degen habarlama kelip túsken, dep habarlaıdy QazAqparat.
Motabar Ibragımova Qaraǵandy qalasynan óziniń turǵylyqty mekenjaıy boıynsha Shymkent qalasyna kele jatqan.
Jol júrý kezinde júktiligine baılanysty ózin jaısyz sezinip, medıtsınalyq kómek suratady.
Kómek suraǵan azamatsha óziniń júktilik merziminiń tolyq 9 aıǵa tolǵanyn eskertken.
Atalǵan habar boıynsha Shyǵanaq stantsııasynyń patrýldik polıtseıi B. Joltaev azamatshaǵa kómek qolyn sozý úshin oqıǵa ornyna jetedi.
Kómekke asyqqan polıtseı azamatshany poıyzdan túsirip alyp, jedel-járdem qyzmetimen Moıynqum aýdandyq perzenthanasyna jetkizedi.
Jedel áreket nátıjesinde aıaǵy aýyr azamatsha atalǵan perzenthanada nárestesin aman-esen dúnıege alyp keldi.
Perzenthanadan shyqqan soń M.Ibragımovany alyp ketýge kelgen joldasy kólik polıtseılerine arnaıy kelip, erekshe alǵysyn bildirgen.
«Mundaı kómekti polıtseılerdiń kórsetýi - azamattyq boldy. Áıelimdi jol ústinde, basqa mekende bosanady dep oılamadym. Janymda eki qyzym bolǵan. Olarmen bul stantsııada qalý múmkin bolmady. Men qyzdarymdy alyp, Shymkentke qaraı kettim. Júkti áıelimdi polıtseılerge senip tapsyrdym. Shúkir. Qazir taǵy bir qyzdyń ákesi atandym. Qyzymdy aman-esen qolyma alýǵa kómek etken kólik polıtseıine alǵysym sheksiz», - deıdi joldasy.
Motabar Ibragımovanyń joldasy áıelin perzenthanadan shyǵaryp alǵan soń, alǵys aıtý úshin Shyǵanaq stantsııasyndaǵy jelilik polıtsııa bólimshesine arnaıy kelgen.
Óz kezeginde kómek etken polıtseıler anasy men ákesin jańa týǵan sábıimen quttyqtap, temir jol vokzalynan Shymkentke qaraı shyǵaryp saldy.
