Kólik polıtseıleri Máskeýdegi alǵashqy áskerı sherýge qatysqan 91 jastaǵy UOS ardagerin quttyqtady

ASTANA. QazAqparat - Otan qorǵaýshy kúni jáne Uly Jeńistiń 71 jyldyǵy qarsańynda QR ІІM Kóliktegi ІІD basshylyǵy men Departamenttiń Ardagerler keńesi birlese otyryp, І jáne ІІ dárejeli Uly Otan soǵysy jáne Jaýyngerlik Qyzyl tý ordenderiniń ıegeri, soǵys jáne tyl ardageri Ivan Karavaevtyń otbasynda boldy. Bul týraly Kóliktegi ІІD baspasóz qyzmeti habarlady.

Kólik polıtseıleri Ivan Dmıtrıevıchti merekesimen shyn júrekten quttyqtap, oǵan aqshalaı jáne azyq-túlik sebetin syılady.

Búginde soǵys ardageri 91 jasta. Júre almaýynyń saldarynan onyń úıden shyǵýǵa múmkindigi shekteýli. Sol sebepti ardagermen kezdesý onyń óz úıinde ótti. Densaýlyǵynyń nasharlyǵyna qaramastan Ivan Dmıtrıevıch óziniń burynǵy áriptesterin qushaq jaıyp, qýanyshpen qarsy aldy. Bul kúni jyldaǵy dástúr boıynsha maıdanger keýdesinde ordenderi men medaldar taǵylǵan saltanatty kıimin kıipti.
Ardagerler keńesiniń tóraǵasy Erbol Shaımerdenov maıdanger qarııaǵa zor densaýlyq tiledi.
Ivan Karavaev 1925 jyly Aqmola oblysynda dúnıege kelgen. 1943 jyly artıllerııa ýchılışesin bitirgennen keıin Ýkraına maıdanyna attandy. Ol osy qurammen Dneprden Pragaǵa deıin, sondaı-aq Bolgarııa, Vengrııa, Avstrııa, Chehııa jáne Slovakııa elderin jaýdan azat etýge qatysty.
Keńes áskerleri Jeńiske qol jetkizgen soń aǵa leıtenant Ivan Karavaev, fashısterdi jeńgen maıdandas joldastarymen birge Qıyr Shyǵysqa Manchjýrııany azat etýge úles qosty. Artynsha Germanııanyń Podstam qalasyna Keńes áskeri tobyna jiberilip, onda taǵy da jeti jyl qyzmet atqardy.
Ol - Máskeý qalasynda Uly Jeńis kúnine arnalǵan alǵashqy áskerı sherýge qatysqan maıdanger.
1952 jyly Qazaqstanǵa oraldy. Soǵystan keıin uzaq jyldar boıy Otanǵa qyzmet etti. Búginde kólik polıtsııasynyń zor maqtanyshy. 20 jylǵa jýyq kóliktegi ishki ister qyzmetinde jumys istedi.
Áriptes qonaqtarmen qoshtasar aldynda otstavkadaǵy polıtsııa polkovnıgi olarǵa kórsetken qurmetteri úshin alǵysyn bildirip, qyzmetterine úlken tabys tiledi.