Kólik polıtseıleri quqyq buzǵan 54 myń adamdy ákimshilik jaýapkershilikke tartty
Búgin Nur-Sultan qalasynda QR ІІM Kóliktegi polıtsııa departamentiniń bastyǵy Ońal Bekeevtiń tóraǵalyǵymen keńeıtilgen májilis ótti. Onda departamenttiń 2019 jylǵy jedel-qyzmettik jumysynyń qorytyndylary talqylanyp, kólik polıtsııasynyń aldaǵy kezeńge arnalǵan mindetteri aıqyndaldy. Májiliske QR Іshki ister mınıstriniń orynbasary Alekseı Kalaıchıdı, Bas kólik prokýrorynyń orynbasary Q. Áblezov sondaı-aq departament apparaty qyzmetteri men jelilik polıtsııa bólinisteriniń basshylary qatysty.
QR Prezıdenti Q.K. Toqaev ótken jyldyń sáýir aıynda ІІM-niń Alqa jınalysynda: «Azamattardyń ál-aýqaty, qalalar men aýyldardyń tynysh ómiri, balalarymyzdyń qaýipsizdigi, sondaı-aq ár úıler men múlikterdiń qorǵalýy polıtseılerge baılanysty» , - degen bolatyn.
«Osy oraıda departament azamattardyń konstıtýtsııalyq quqyqtary men bostandyqtaryn qamtamasyz etý, quqyqtyq tártip pen zańdylyqty nyǵaıtý baǵytyndaǵy Memleket basshysy Qasym-Jomart Kemeluly Toqaevtyń, Іshki ister mınıstrliginiń alǵa qoıǵan mindetterin oryndaýǵa, sondaı-aq, elimizdiń áýe jáne temir jol kóligi nysandaryndaǵy qoǵamdyq tártip pen qaýipsizdikti qamtamasyz etýge baǵyttalǵan qajetti sharalardy qabyldaýda», - dedi Ońal Bekeev.
Onyń aıtýynsha, 2019 jylǵy qyzmettiń bedelin arttyrý, halyqtyń quqyqtyq mádenıetin jetildirý boıynsha birqatar is-sharalar uıymdastyrylyp, ótkizildi.
Qazaqstannyń kólik polıtseıleri ótken jyly temirjol kóliginiń 20 mln asa jolaýshysy men áýe kóliginiń 14 mln jolaýshysynyń qaýipsizdigin qamtamasyz etti.
Ótken jylǵy jedel-qyzmettik is-sharalardyń nátıjelerin jarııa ete otyryp, O. Bekeev KPD qyzmet kórsetetin aýmaqta júrgizilgen keshendi uıymdastyrýshylyq-tájirıbelik sharalardyń nátıjesinde quqyq buzý faktileri 12,4%-ǵa, onyń ishinde ortasha aýyr qylmystar 16,4%-ǵa jáne aýyr qylmys deńgeıi 13,1%-ǵa tómendegenin aıtty. Sondaı-aq, bóten múlikti urlaý 18%-ǵa jáne esirtki qylmysy 18,4%-ǵa tómendegen.
Byltyrǵy jyldyń 12 aıynda departamenttiń jedel qyzmet kórsetý aýmaǵynda 2143 qylmystyq quqyq buzýshylyq tirkelip, olardyń ashylýy 72,9%-dy qurady. Sondaı-aq, 54153 quqyq buzýshy ákimshilik jaýapkershilikke tartylyp, olarǵa 106 mln teńgeden asa ákimshilik aıyppul salyndy.
Basqosýda zańsyz kóshi-qon máselelerine de basa nazar aýdaryldy. QR Kóshi-qon zańnamasyn buzǵany úshin 2729 tulǵa ákimshilik jaýapkershilikke tartylyp, sot qaýlysymen 234 sheteldik azamat elden shyǵaryldy.
Májilisti qorytyndylaı kele Alekseı Kalaıchıdı is-sharalar keshenin iske asyrý sheńberinde kadr saıasatyn jetildirý, tártip pen zańdylyqty nyǵaıtý, departamenttiń jeke quramy arasynda sybaılas jemqorlyqqa qarsy is qımyl jumystaryn jandandyrý qajettigin nyqtap aıtty.
«Búgingi kúni negizgi eseptik kórsetkishterdi jaqsartyp qana qoımaı, polıtseıler qoǵamnyń ózderine degen senimin nyǵaıtý jolynda da eńbek etýi tıis»,- dep túıindedi sózin Іshki ister mınıstriniń orynbasary.