Kólik polıtseıleri Qaskeleń turǵynynan salmaǵy 7 keliden astam geroın tárkiledi
ASTANA. QazAqparat - Ústimizdegi jyldyń aqpan aıynyń basynda Kóliktegi ІІD-niń Esirtkige qarsy kúres basqarmasynyń qyzmetkerlerimen júrgizilgen jedel-izdestirý sharalary barysynda Astana stansasynyń temir jol vokzaly perronynda «Almaty-1-Astana» baǵytyndaǵy jolaýshylar poıyzynan túsken Almaty oblysy, Qaskeleń qalasynyń 28 jastaǵy turǵyny ustaldy.
Odan 8 keliden astam geroın tárkilendi.
Tekserý barysynda onyń qara tústi jol sómkesiniń ishinen aq tústi untaq tárizdes zaty bar, skotchpen jabystyrylǵan, polıetılendi paket alyndy. Saraptamanyń qorytyndysyna sáıkes, onyń jalpy salmaǵy 8 keli 446 gramm bolatyn asa iri kólemdegi geroın ekendigi anyqtaldy.
Tekserý kezinde kúdikti esirtki zatyn Almatydan Astanaǵa deıin temir jol kóligimen tasymaldaýdy júzege asyryp, ol úshin aqshalaı syıaqy alýy kerek bolǵany belgili boldy. Sondaı-aq, qosymsha jedel-izdestirý sharalaryn júrgizý barysynda Almaty qalasynda osy esirtki zatyn jóneltýshi ustaldy.
Osy fakt boıynsha QR QK 297-baby 3-bóliginiń 1 jáne 3-tarmaqshalary, ıaǵnı esirtki, psıhotroptyq zattardy, sol tektesterdi, ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý, adamdar tobynyń aldyn ala sóz baılasýymen, asa iri mólsherdegi esirtki boıynsha qylmystyq is qozǵaldy. Qazir tergeý amaldary júrgizilýde, dep habarlaıdy Kóliktegi ІІD baspasóz qyzmeti.
